امریکی صدر کا فلسطین کے ہسپتال کیلئے 10 کروڑ ڈالر امداد کا اعلان

مقبوضہ بیت المقدس: (ویب ڈیسک) امریکی صدر جوبائیڈن نے فلسطین کے آگستا وکٹوریہ ہسپتال کے لیے 10 کروڑ ڈالر امداد کا اعلان کردیا ہے۔
غیر ملکی میڈیا رپورٹس کے مطابق امریکی صدر جو بائیڈن نے مقبوضہ بیت المقدس اور بیت لحم کا دورہ کیا، بیت لحم میں فلسطینی ہم منصب محمود عباس سے ملاقات کی۔
جوبائیڈن نے کہا کہ امریکا فلسطین اور اسرائیل کو مذاکرات کی میز پر لانے کے لیے کوشاں ہے، اگرچہ حالات سازگار نہیں ہیں لیکن میری انتظامیہ کوشش جاری رکھے گی۔
فلسطینی صدر محمود عباس نے صحافی ابو عاقلہ کے قاتلوں کو انصاف کے کٹہرے میں لانے کا مطالبہ بھی کیا اور کہا کہ مسئلہ فلسطین کا دو ریاستی حل ہمیشہ کے لیے دستیاب نہیں رہے گا۔