لاہور: (ویب ڈیسک) ہالی وڈ کے 60 سالہ اسٹار ٹام کروز شوٹنگ کے دوران خطرناک اسٹنٹ خود کرنے کے لیے مشہور ہیں اور اس کے لیے اسٹنٹ مین کا سہارا نہیں لیتے۔
خاص طور پر مشن امپاسبل سیریز کی فلموں نے ٹام کروز کے اسٹنٹس کو پوری دنیا میں مشہور کردیا ہے۔اس سیریز کی 7 ویں فلم تو 2023 میں ریلیز ہوگی مگر مشن امپاسبل 8 کی عکسبندی بھی برطانیہ میں جاری ہے۔
اس فلم کی شوٹنگ کے دوران ٹام کروز کے ایک نئے اسٹنٹ کی تصاویر وائرل ہوگئی ہیں۔
لیک ڈسٹرکٹ میں فلم کی شوٹنگ کے دوران ٹام کروزایک خطرناک اسٹنٹ کے دوران پہاڑی سے چھلانگ لگانے کے بعد پیرا گلائیڈنگ کرتے ہوئے زمین پر اترے۔
اداکار زمین پر اترنے کے بعد سین کو بہترین بنانے کے لیے وقت ضائع کیے بغیر ہیلی کاپٹر پر سوار ہوکر ایک بار پھر پہاڑی پر پہنچے اور اس اسٹنٹ کو دوبارہ دہرایا۔
یہ پہلا موقع نہیں جب اداکار نے مشن امپاسبل 7 اور 8 کے لیے جان لیوا اسٹنٹ کیا۔
ستمبر 2021 میں انہوں نے مشن امپاسبل 8 کے لیے گرتی ٹرین پر ایک اسٹنٹ کیا تھا۔
اس اسٹنٹ میں ٹرین کو ایک پہاڑی سے نیچے گرتے ہوئے دکھایا گیا تھا اور اداکار اس پر سے پیرا شوٹ سے چھلانگ لگا کر اترے تھے۔
اسی فلم کے لیے انہوں نے ایک سین کے لیے موٹر بائیک پر بیٹھ کر پہاڑی کے کنارے سے نیچے جمپ لگانے کا منظر عکسبند کیا تھا اور یہ انہوں نے خود کیا تھا۔
اس کے بارے میں ٹام کا کہنا تھا کہ یہ ان کی زندگی کا خطرناک ترین اسٹنٹ تھا اور ذرا سی غلطی بھاری پڑسکتی تھی۔
کورونا وائرس کی وبا کے باعث مشن امپاسبل 7 اور 8 کی ریلیز تاخیر کا شکار ہوگئی ہے۔
مشن امپاسبل 7 کو ڈیڈ ریکنگ پارٹ 1 کا نام دیا گیا ہے جو 14 جولائی 2023 کو ریلیز ہوگی جبکہ اس کا دوسرا حصہ 28 جون 2024 کو ریلیز کیا جائے گا۔
دونوں فلموں کی ہدایات کرسٹوفر میکوائر دیں گے۔
مشن امپاسبل 7 میں ٹام کروز کے ساتھ ان کی ٹیم میں شامل ربیکا فرگوسن، سائمن پیگ اور وائنگ رحمس کی بھی واپسی ہوگی جبکہ چند نئے کرداروں کو بھی متعارف کرایا جائے گا۔
مشن امپاسبل 7 کا پہلا ٹریلر مئی 2022 کو ریلیز ہوا تھا۔
