جڑواں شہروں سمیت بالائی علاقوں میں بارش، نشیبی علاقے زیرآب، ندی نالوں میں طغیانی

اسلام آباد: (ویب ڈیسک) اسلام آباد اور راولپنڈی سمیت بالائی علاقوں میں موسلا دھار بارش سے جل تھل ایک ہو گیا۔تیز ہواوں کیساتھ طوفانی بارش سے نشیبی علاقے ڈوب گئے۔نالے بھی پانی سے بھرگئے۔
جڑواں شہروں میں بارش نے انٹری دے دی ۔ اسلام آباد اور راولپنڈی کے مختلف علاقوں میں گرج چمک کیساتھ تیز بارش کا سلسلہ جاری ہے۔ بارش سے گرمی کا زور ٹوٹ گیا اور موسم خوشگوار ہو گیا ہے۔جڑواں شہروں میں اب تک 32ملی میٹر سے زائد بارش ریکارڈ کی جا چکی ہے۔
راولپنڈی کے نشیبی علاقے بارش سے زیر آب آگئے۔صادق آباد، شکریال، ڈھوک کالاخان میں پانی گلیوں میں داخل ہو گیا۔ ندیم کالونی، جاوید کالونی اور پیرودھائی کے علاقوں میں بھی پانی بھر گیا۔
ہیوی مشینری نالہ لئی ،کمیٹی چوک اور صادق آباد کے علاقے میں پہنچا دی گئی۔واسا کے عملے کو ہائی الرٹ کردیا گیا ،ایم ڈی واسا فیلڈ میں موجود ہیں۔
ملکہ کوہسار مری ، کہوٹہ اور کوٹلی ستیاں میں بھی موسلا دھار بارش کے باعث ندی نالوں میں طغیانی آ گئی۔ بارش کے باعث پہاڑی علاقوں میں لینڈ سلائیڈنگ کا خطرہ ہے۔
صوابی میں بھی موسلادھار بارش کا سلسلہ جاری ہے۔بارش کے باعث نشیبی علاقوں میں پانی داخل ہو گیا۔ ندی نالے بپھر گئے۔
محکمہ موسمیات کے مطابق سندھ ،بلوچستان اور خیبر پختونخوا میں بارشوں کا سلسلہ 14 ستمبر تک جاری رہے گا۔