ڈالر منہ روز، روپیہ مزید کمزور، امریکی کرنسی کی قدر میں مسلسل اضافہ

لاہور: (ویب ڈیسک) پاکستانی روپے کی بے قدری اور امریکی کرنسی کی قیمت میں مسلسل اضافہ جاری ہے، انٹر بینک میں ڈالر مزید مہنگا ہو گیا۔
فاریکس مارکیٹ ڈیلرز کے مطابق سیاسی خلفشار، دوست ممالک کا مالی مدد کرنے کے حوالے سے محتاط رویے کے باعث امریکی ڈالر روپے کو مسلسل کمزور کررہا ہے۔
انٹربینک میں امریکی ڈالر مزید 2 روپے 18 پیسے مہنگا ہونے کے بعد 232 روپے پر فروخت ہو رہا ہے، جبکہ اوپن مارکیٹ میں بھی امریکی کرنسی کی قدر میں 2 روپے اضافہ ہونے کے بعد 238 روپے پر ٹریڈ کر رہی ہے۔
صرف رواں ماہ کے آغاز سے اب تک انٹر بینک میں ڈالر 13 روپے مہنگا ہو کر 232 روپے پر پہنچ گیا ہے، روپے کی قدر گرنے سے صرف ستمبر کے دوران بیرونی قرضوں میں بیٹھے بٹھائے 1400 ارب سے زائد کا اضافہ ہوچکا ہے۔