شمالی کوریا خفیہ طور پر روس کو گولہ بارود فراہم کر رہا ہے، امریکا

واشنگٹن: (ویب ڈیسک) امریکا نے الزام عائد کیا ہے کہ یوکرین جنگ میں شمالی کوریا خفیہ طور پر روس کو آرٹلری گولے فراہم کر رہا ہے۔
عالمی خبر رساں ادارے کے مطابق امریکا کے قومی سلامتی کے ترجمان جان کربی نے شمالی کوریا اور روس کے گٹھ جوڑ پر کڑی تنقید کرتے ہوئے کہا کہ یہ دونوں ممالک یوکرین میں تباہی کے ذمہ دار ہیں۔
جان کربی نے دعویٰ کیا ہے کہ شمالی کوریا مشرق وسطیٰ اور افریقا میں ترسیل کی آڑ میں روس کو گولہ بارود کی بڑی تعداد فراہم کر رہا ہے۔ ہم اس پورے روٹ کی ہر وقت نگرانی کر رہے ہیں۔
ترجمان قومی سلامتی سے جب یہ پوچھا گیا کہ گولہ بارود روس نے موصول کرلیا اور یوکرین پر استعمال بھی ہو رہا ہے تو جان کربی نے جواب دیا کہ ابھی اس بات کی تصدیق نہیں کرسکتے۔
دوسری جانب روس نے امریکی الزام کی نہ تو تصدیق کی ہے اور نہ ہی تردید کی ہے۔
خیال رہے کہ اس سے قبل امریکا نے ایران پر الزام عائد کیا تھا کہ وہ روس کو خودکش بمبار ڈرونز فراہم کر رہا ہے جو یوکرین پر استعمال بھی ہوئے۔ امریکا نے ڈرونز کے ملبے کی تصاویر بھی شیئر کی تھیں۔
رواں برس فروری میں روس نے یوکرین پر حملہ کردیا تھا اور چار علاقوں کو اپنے باغی جنگجوؤں کی مدد سے فتح کرکے متنازع ریفرنڈم کرایا جس کے نتیجے میں ان چاروں یوکرینی علاقوں کا اپنے ساتھ الحاق کرلیا۔
یوکرین کی جانب سے روس کے خلاف شدید مزاحمت بھی کی جارہی ہے اور مقبوضہ چاروں علاقوں کو حاصل کرنے کے لیے پیش قدمی بھی کی گئی جس کے جواب میں صدر پوٹن نے ان چاروں علاقوں میں مارشل لا نافذ کردیا۔