سسرال میں ہی رہتی ہوں: صبا فیصل کی بہو نے خاموشی توڑ دی

لاہور: (ویب ڈیسک) معروف اداکارہ صبا فیصل کی جانب سے بیٹے سلمان فیصل اور بہو نیہا سلمان سے تعلق ختم کرنے کے اعلان کے بعد ان کی بہو نے بھی خاموشی توڑ دی۔
سوشل میڈیا پیچز کے مطابق صباء فیصل کی چھوٹی بہو نیہا سلمان نے اپنے انسٹاگرام اکاؤنٹ پر پوسٹ شیئر کی جس میں انہوں نے اپنی ساس صبا فیصل اور نند یعنی اداکارہ سعدیہ فیصل کو بغیر نام لیے تنقید کا نشانہ بنایا۔
نیہا سلمان نے اپنے فالورز کو پیغام دیتے ہوئے پوسٹ میں لکھا کہ اپنی زندگی کا موازنہ ان کے ساتھ ہرگز نہ کریں جو حرام کے مزے لیتے ہیں۔
انہوں نے لکھا ہوسکتا ہے کہ وہ آپ سے زیادہ کامیاب نظر آئیں یا آپ سے زیادہ مزے کر رہے ہوں گے لیکن اللہ کے سامنے وہ کچھ بھی نہیں ہیں اور اسی بات کی اہمیت ہے۔
نیہا نے پوسٹ کے کیپشن میں یہ بھی لکھا کہ ’ہمیشہ صحیح راستے پر چلیں، پھر چاہے کتنی ہی مشکلات کا سامنا کرنا پڑے یا پھر جب آپ خود کو غلط سمجھ رہے ہوں تب بھی مضبوط رہیں اور حرام کے خلاف اپنا مؤقف واضح رکھیں، یہ دنیا فانی ہے‘۔
اس کے علاوہ سوشل میڈیا صارفین نے جب نیہا کو ان کے بیان کے بعد تنقید کا نشانہ بنایا تو انہوں نے یہ بھی کہا کہ میں نے یہ پیغام تمام مسلمانوں کے لیے شیئر کیا ہے اور حلال حرام کا ہم سب کو پتہ ہے۔
صبا فیصل کی ہی پوسٹ پر نیہا نے یہ بھی کمنٹ کیا کہ وہ اپنے سسرال سے الگ نہیں بلکہ وہیں قیام پذیر ہیں۔
خیال رہے کہ گزشتہ روز صبا فیصل نے نیہا سلمان کی جانب سے انہیں اور ان کے خاندان کو سوشل میڈیا پر بدنام کیے جانے پر بیٹے اور بہو سے لاتعلقی کا اعلان کیا جس کی حمایت بڑے بیٹے ارسلان فیصل نے بھی کی۔