لڑکی کو گھورا یا سیٹی بجائی تو جیل جانا پڑے گا

برطانیہ : (ویب ڈیسک) برطانیہ میں خواتین کی حفاظت کیلئے قانون سخت کر دئیے گئے، سڑک پر کسی بھی طرح لڑکی کو ہراساں کیا تو دو برس کی سزا دی جائے گی۔
برطانوی وزیر داخلہ سویلا بریورمین نے نئے منصوبے پر کام شروع کیا ہے، اس قانون کے تحت کسی کو دیکھ کر سیٹی بجانا، نامناسب اشارہ کرنا، پیچھا کرنا اور گھورنا جرم ہوگا۔
برطانوی وزیر داخلہ نے کہا کہ ہر خاتون کو کہیں بھی جانا، کسی بھی راستے سے گزرنا محفوظ لگنا چاہیے، اور جو کوئی ایسی غلط حرکت کا سوچے گا اسے نتائج کی بارے میں بھی سوچنا ہو گا۔
واضح رہے برطانیہ میں جنسی ہراسانی پہلے ہی جرم ہے اور تاہم اب اس نئے قانون سے لوگوں کو ہراسانی رپورٹ کرنے کی حوصلہ افزائی ہوگی۔
سروے کے مطابق برطانیہ میں دو تہائی خواتین خود کو رات یا دن کے کسی وقت محفوظ تصور نہیں کرتیں، لیکن وہ اس بارے میں رپورٹ بھی درج نہیں کرا پاتی ہیں۔
ٹرانسپورٹ فار لندن کے مطابق ایک سال کے دوران ٹرینوں اور بسوں میں جنسی ہراسانی کے 1813 واقعات رپورٹ ہوئے۔