ممبئی: (ویب ڈیسک) مسٹر پرفیکشنسٹ عامر خان کی سابقہ اہلیہ کرن راؤ کے ہمراہ ہندو مذہب کے طور طریقوں سے پوجا پاٹ کرتے ہوئے تصویریں سوشل میڈیا پر وائرل ہیں۔
تصاویر عامر خان کی فلم ’لال سنگھ چڈا‘ کے ڈائریکٹر ادویت چندن کی جانب سے انسٹاگرام پر شیئر کی گئی ہیں جن پر ان کا لکھنا ہے کہ ’عامر خان پروڈکشنز کے نئے آفس میں پوجا‘۔
عامر خان کو دھاتی برتن پکڑے ہوئے دیکھا جاسکتا ہے، ایک تصویر میں عامر خان تھالی ہاتھ میں تھامے آرتی اتار رہے ہیں جبکہ ایک تصویر میں ناریل پکڑ کر بیٹھے ہوئے ہیں۔
اداکار نے اس موقع پر روایتی قمیص اور جینز پہنی ہوئی ہے، گلے میں ایک لمبی سی سفید شال اور ماتھے پر بڑی سی تلک بھی لگائی ہوئی ہے۔
کچھ مداح قیاس آرائیاں کر رہے ہیں کہ مسٹر پرفکشنسٹ کسی نئی فلم کی تیاری کر رہے ہیں جبکہ کچھ مداح عامر خان کے ہندو روایتوں کو اپناتے ہوئے پوجا کرنے پر سخت ناراض نظر آ رہے ہیں۔
رواں برس نومبر میں عامر خان نے فلم ’لال سنگھ چڈا‘ کے فلاپ ہونے کے بعد اپنے کیریئر کے 35 برسوں میں پہلی بار اداکاری سے بریک لینے کا اعلان کیا تھا۔
انہوں نے ایک تقریب کے موقع پر بتایا تھا کہ 35 سال سے مسلسل اداکاری کرنے کے بعد اب وہ کچھ وقت اپنے بچوں اور والدہ کے ساتھ گزارنے کے خواہش مند ہیں۔
