ممبئی: (ویب ڈیسک) بالی ووڈ کنگ شاہ رخ خان فیفا ورلڈکپ 2022ء کے فائنل کو یادگار بنانے کے لیے تیار ہیں۔
اداکار نے انسٹاگرام پر اپنی فلم کی خصوصی پروموشنل ویڈیو شیئر کی ہے جس میں انہوں نے مداحوں کو اہم پیغام دیا ہے۔
شاہ رخ خان نے اپنے مداحوں سے مخاطب ہوکر کہا ہے کہ سب اپنی کرسی کی پیٹی باندھ لیں، موسم بگڑنے والا ہے لیکن قطر میں نہیں بلکہ جیو سنیما اور اسپورٹس 18 کے اسٹوڈیو میں۔+انہوں نے بتایا کہ وہ 18 دسمبر کی شام کو فیفا ورلڈ کپ کا فائنل دیکھنے کے لیے قطر آرہے ہیں۔
اداکار نے اپنے روایتی مزاحیہ انداز میں کہا کہ’ اور ہوسکتا ہے کہ اس بہانے وین رونی سے بھی میری کچھ بات چیت ہوجائے‘۔
شاہ رخ خان نے اس پروموشنل ویڈیو کے آخر میں مداحوں کو یاد دہانی کرواتے ہوئے کہا کہ’ یہ ضرور یاد رکھنا کہ (پٹھان) 25 جنوری کو ریلیز ہونے والی ہے‘۔
گزشتہ روز بھارتی میڈیا پر یہ خبر سامنے آئی تھی کہ شاہ رخ خان اپنی فلم ’پٹھان‘ کو پروموٹ کرنے کے لیے قطر جائیں گے۔
