نیو یارک: (ویب ڈیسک) امریکا میں موسم سرما کے بدترین طوفان ’’ بم سائیکلون ‘‘ کے باعث مختلف حادثات میں اموات کی تعداد 70 کے قریب جا پہنچی۔
غیر ملکی خبر رساں ادارے کے مطابق امریکا میں بم سائیکلون نامی سرد طوفان کی تباہ کاریاں جاری ہیں جس کے نتیجے میں اب تک 70 کے قریب افراد زندگی کی بازی ہار چکے ہیں جبکہ ایک لاکھ 20 ہزار سے زائد گھروں کو بجلی کی فراہمی معطل ہو چکی ہے۔
بفیلو میں 30 سے زائد افراد کے ہلاک ہونے کی اطلاع ہے جبکہ لوگوں کو سڑکوں سے دور رکھنے کیلئے ملٹری پولیس کو طلب کیا گیا ہے۔
امریکی محکمہ موسمیات کے مطابق ملک کے مغربی علاقوں میں آج مزید برفباری متوقع ہے۔
