لاہور: (ویب ڈیسک) طالبات کی طرف سے نشے سے انکار پر ساتھی طالبہ پر تشدد کے واقعے پر اداکار و گلوکار علی ظفر نے اپنے ذاتی تجربات شیئر کردیئے۔
علی ظفر نے سکول میں تشدد کے واقعے کی سخت مذمت کی ہے اور کہا ہے کہ سکول میں اس طرح کے واقعات کو ختم کرنے کیلئے درست اپروچ اپنانے کی ضرورت ہے۔
لاہور کے ایک ایلیٹ سکول میں نشے سے انکار پر ایک لڑکی پر ساتھی طالبات نے تشدد کیا تھا جس کی ویڈیو سوشل میڈیا پر وائرل ہوئی اور لڑکیوں کے خلاف پولیس مقدمہ بھی درج کیا گیا۔
علی ظفر نے ٹوئٹر پر ایک طویل پوسٹ میں تفصیل سے لکھا کہ ان کو کالج کے دنوں میں متعدد مرتبہ اس طرح کی غنڈہ گردی کا سامنا کرنا پڑا، ان کے انگریزی لہجے اور کپڑوں کو تضحیک کا نشانہ بنایا جاتا رہا ہے اور یہ کئی برسوں تک جاری رہا ہے۔
انہوں نے تجویز دی کہ سکولوں کو غنڈہ گردی پر ایک بہت واضح پالیسی اپنانی چاہیے، اساتذہ اور سٹاف کو تربیت دی جائے کہ وہ اس قسم کے تشدد کو پہچان سکیں۔
اداکار کے مطابق سکولوں کے ساتھ ساتھ والدین پر بھی بڑی ذمہ داری عائد ہوتی ہے کہ وہ اپنے بچوں کی اچھی تربیت کریں، وہ اپنے بچوں کی تربیت پر پوری توجہ دیں۔
