کیویز کا شکار: ترکش میں تیر آج سجائے جائیں گے

لاہور:(ویب ڈیسک) نیوزی لینڈ سے ہوم سیریز کیلئے ترکش میں تیر آج سجائے جائیں گے جب کہ سلیکٹرز لاہور میں سرجوڑ کر بیٹھیں گے۔
نیوزی لینڈ کے خلاف سیریز اور دوسرے معاملات کو حتمی شکل دینے کے لیے آج سے سرگرمیوں میں تیزی آجائے گی، کیویز سے وائٹ بال سیریز کیلئے سکواڈز کی تشکیل کیلئے سلیکٹرز آج لاہور میں سر جوڑ کر بیٹھیں گے، عمرہ ادائیگی کے لیے جانے والے کپتان بابر اعظم کی بھی گھر واپسی ہو گی۔
پاکستانی ٹیم کے غیر ملکی کوچنگ سٹاف کی آمد کا سلسلہ بھی آج سے ہی شروع ہورہا ہے، پہلے مرحلے میں ہیڈ کوچ گرانٹ بریڈ برن اور بیٹنگ کوچ اینڈریو پیوٹک ذمہ داریاں سنبھالنے کے لیے لاہور پہنچ رہے ہیں۔
ٹیم ڈائریکٹر اور کنسلٹنٹ مکی آرتھر کی لاہور آمد کا دن ابھی تک طے نہیں ہو پایا جبکہ باؤلنگ کوچ مورنے مورکل کے بارے میں اطلاعات ہیں کہ وہ آئی پی ایل کے بعد اپنی خدمات پیش کریں گے۔
ہیڈ کوچ بریڈ برن اور بیٹنگ کوچ اینڈریو پیوٹک پی سی بی حکام کے ساتھ سلیکشن کمیٹی اور کپتان بابر اعظم سے بھی ملاقات کرکے سیریز کی حکمت عملی ترتیب دیں گے، قومی ٹیم کے ساتھ ٹیم مینجمنٹ کا بورڈ سربراہ نجم سیٹھی کی منظوری ملنے کے بعد باقاعدہ اعلان منگل تک کردیا جائے گا۔
سیریز کی تیاریوں کے لیے کیمپ 7 اپریل سے لگایا جارہا ہے جب کہ سیریز میں معمولی ردوبدل کے بعد شیڈول بھی اسی ہفتے جاری ہوگا۔
ادھر نیوزی لینڈ کے خلاف وائٹ بال کی ہوم سیریز سے قبل ہی کوچنگ سٹاف کے ساتھ مختلف پوزیشنز پر تقرریاں بھی متوقع ہیں، اس سیریز میں غیرملکی کوچنگ سٹاف کے ساتھ ٹیم کو نئے منیجر بھی میسر آئیں گے۔
منصور رانا کی جگہ ریحان الحق کو یہ ذمہ داری سونپے جانے کا امکان روشن دکھائی دے رہا ہے، وہ پی ایس ایل فرنچائز اسلام آباد یونائیٹڈ کے ساتھ بطور جنرل منیجر تعینات ہیں، قومی ٹیم کے نئے متوقع ٹیم ڈائریکٹر اور کنسلٹنٹ مکی آرتھر کی خواہش پر ہی ریحان کو اس پوسٹ کیلئے موزوں خیال کیا جارہا ہے۔
ان کے ساتھ اسلام آباد یونائیٹڈ کے لیے کھلاڑیوں کا ڈیٹا جمع کرنے اور ٹیم سٹریٹجی میں معاونت کرنے والے حسن چیمہ کی خدمات بھی قومی ٹیم کیلئے بطور پر اینالٹکس حاصل کی جا سکتی ہیں۔
پی سی بی کی جانب سے گزشتہ ہفتے ٹیم منیجر اور منیجر اینالٹکس کی پوزیشن کے لیے الگ الگ اشتہارات جاری کیے جاچکے ہیں اور درخواستیں جمع کرانے کی ڈیڈ لائن 6 اپریل رکھی گئی ہے۔
ذرائع کے مطابق پی سی بی حکام پہلے سے ہی ریحان اور حسن چیمہ کی تقرری کا ذہن بناچکے ہیں، اسی طرح لیگ کمشنر، ڈائریکٹر ایچ آر اینڈ ایڈمنسٹریشن اور ہیڈ آف ٹکٹنگ اینڈ ہاسپیٹلیٹی کی آسامیاں بھی مشتہر کی گئی ہیں۔
پی سی بی کے ساتھ پہلے سے وابستہ نائیلہ بھٹی کو لیگ کمشنر، خیام قیصر کو ڈائریکٹر ایچ آر اور مہوش عمر کی ہیڈ آف ٹکٹنگ اینڈ ہاسپیٹلیٹی پر تعیناتی بھی یقینی دکھائی دے رہی ہے، ضروری رسمی کاغذی کارروائی مکمل ہونے کے بعد ان 5 عہدوں پر ان افراد کی تقرریوں کا نوٹیفکیشن جاری ہوسکے گا۔