اسلام آباد: (ویب ڈیسک) وفاقی ادارہ شماریات نے ملک میں مہنگائی کی صورتحال پر ہفتہ وار رپورٹ جاری کر دی۔
ادارہ شماریات کی رپورٹ کے مطابق ہفتہ وار مہنگائی کی شرح میں 0.92 فیصد کا اضافہ ہوا اور ہفتہ وار بنیاد پر مہنگائی کی مجموعی شرح 44.49 فیصد ریکارڈ کی گئی۔
ایک ہفتے میں27 اشیاء کی قیمتوں میں اضافہ ہوا، 7 اشیاء کی قیمتوں میں کمی اور 17 کی قیمتوں میں استحکام رہا، ایک ہفتے میں چینی کی فی کلو قیمت میں 14 روپے 64 پیسے کا اضافہ ہوا، ملک میں چینی کی فی کلو قیمت 123 روپے27 پیسے ہوگئی۔
رپورٹ کے مطابق 20 کلو آٹے کا تھیلا 81 روپے 66 پیسے مہنگا ہوا، 20 کلو آٹے کے تھیلے کی قیمت 2 ہزار 717 روپے سے بڑھ گئی، زندہ مرغی کی فی کلو قیمت میں 51 روپے 83 پیسے اضافہ ہوا۔
ادارہ شماریات کا کہنا ہے کہ آلو کی فی کلو قیمت میں 2 روپے 99 پیسے اضافہ ہوا، ہفتے کے دوران کیلے فی درجن 11 روپے 52 پیسے مہنگے ہوئے، مٹن 2 روپے 73 پیسےاور بیف 5 روپے 15 پیسےمہنگا ہوا۔
رپورٹ کے مطابق ایک ہفتے میں دال، چاول سمیت دودھ، دہی، انڈے بھی مہنگے ہوئے، پیاز 14 روپے سستا ہوا، ایک ہفتے میں ٹماٹر کی قیمت میں 13 روپے 15 پیسے کمی ہوئی، ایل پی جی کا گھریلو سلنڈر 122 روپے 58 پیسے سستا ہوا۔
ملک میں مہنگائی کی صورتحال پر ہفتہ وار رپورٹ جاری
