کوکا کولا یوریشیا اور مشرق وسطیٰ کے وفد کا سفارتی،حکومتی اور این جی او سیکٹرز کے ساتھ تعلقات کی مضبوطی کیلئے پاکستان کا دورہ

اسلام آباد(ویب ڈیسک) کوکا کولا کے ایک سینئر بین الاقوامی وفد نے اپنے شراکت داروں اور حکومت کے وسیع نیٹ ورک کے ساتھ تعلقات کو مضبوط بنانے کے لیے پیر کو اسلام آباد کا دورہ کیا۔
کوکا کولا کی اعلیٰ قیادت نے پاکستان میں امریکی سفیر ایچ ای ڈونلڈ بلوم کے ساتھ ساتھ یو ایس ایڈ اور امریکی محکمہ تجارت کے رہنماؤں سے ملاقات کی، اور خاص طور پرحال ہی میں سیلاب سے متاثرہ صوبوں کی بحالی کیلئے کوکا کولا اور یو ایس ایڈ کے درمیان مفاہمتی معاہدہ کے تناظر میں حالیہ سیلاب کی بحالی کی ضروریات پر غور کرتے ہوئے پاکستان کی معیشت کو مضبوط بنانے کے طریقوں پر تبادلہ خیال کیا گیا۔
کوکا کولا کمپنی یوریشیا،مڈل ایسٹ کے پبلک افیئرز، کمیونیکیشن اور سسٹین ایبلٹی کے نائب صدر Sinan CemSahin نے پاکستان کے ساتھ کمپنی کی وابستگی پر تبادلہ خیال کرتے ہوئے کہا کہ”ہم گزشتہ کئی دہائیوں سے پاکستان کے سماجی تانے بانے، اس کے سفر اور اس کی کامیابی کی کہانی کا حصہ ہیں۔ اب ہماری ترجیح مضبوط معاشی ترقی کے ذریعے سیلاب کے بعد ہونے والی تباہی سے اجتماعی طور پر باہر نکلنا ہے، اور اپنے مقصد کے مطابق ہم متعدد شعبوں میں کمیونٹیز کی حمایت جاری رکھیں گے۔“
انہوں نے کہا کہ کوکا کولا، پینے کے صاف پانی تک رسائی کو بہتر بنانے، غذائی پروگراموں میں اضافہ، اور آب و ہوا کے خلاف مزاحمت کرنے والے کمیونٹیز کی تعمیر نو کے ذریعے اس مقصد کی حمایت کرتا ہے۔
وفد کی وزیر اعظم کے خصوصی مشیر برائے ریونیو طارق پاشا، وفاقی سیکرٹری بورڈ آف انوسٹمنٹ اسد رحمان گیلانی اور دیگر اہم فیصلہ سازوں کے ساتھ بھی اعلیٰ سطح ملاقاتیں ہوئیں،جہاں موجودہ میکرو اکنامک چیلنجز، سرمایہ کاری کی ٹائم لائنز اور پالیسیوں پر تبادلہ خیال کیا گیا۔
کوکا کولا پاکستان اور اینکر بوٹلر Coca- Cola içecek ملک کے جی ڈی پی میں تقریباً3فیصد کا حصہ ڈالتے ہیں اور تقریباً10لاکھ پاکستانیوں کو روزگار فراہم کرتے ہیں۔
Coca- Cola içecek کے چیف کارپوریٹ افیئرز و سسٹین ایبلٹی افسر ServetYildirim نے بھی رمضان المبارک کے مقدس مہینہ کے حوالے سے منعقدہ تقریب سے خطاب کیا اور کہا ”ایک ترک کمپنی کے طور پر ہم محسوس کرتے ہیں کہ ہمارے کاروباری اہداف صرف باہمی اعتماد پر نہیں بلکہ گہرے ثقافتی تعلقات پر بھی استوار ہیں، چونکہ دونوں ممالک قدرتی آفات سے نبرد آزما ہیں، ایسے میں معاشی استحکام میں نجی شعبہ اہم کردار ادا کرسکتا ہے۔“
تقریب میں کوکا کولا نے دس این جی او پارٹنرز کو خواتین کو بااختیار بنانے، سیلاب کے بعد امدادی سرگرمیوں، غذائی تحفظ، پانی کی فراہمی، اورکچرے سے پاک دنیا کے اقدامات میں ان کے تعاون کے لیے اعزاز سے نوازا۔کیئر انٹرنیشنل، واٹر ایڈ، انڈس ارتھ ٹرسٹ، رزق فاؤنڈیشن، نیشنل انکیوبیشن سینٹر، ای سی او، کراچی پورٹ ٹرسٹ، بوندِ شمس اور ڈبلیو ڈبلیو ایف پاکستان سمیت شراکت داروں کو کوکا کولا کی جانب سے تعریفی اسناد سے نوازا گیا۔کمپنی نے شراکت داروں کے ساتھ مل کر پاکستان میں ملک گیر کمیونٹی پروگرامز کے تحت گزشتہ چند سالوں میں 7 ملین سے زیادہ فلاحی خدمات سر انجام دی ہیں۔کمپنی کی توجہ خواتین کو بااختیار بنانے، سیلاب کے بعد امدادی سرگرمیوں اور پانی کی فراہمی پر مرکوز ہے،جس کا مقصد ملک کے سماجی و اقتصادی چیلنجوں کے لیے پائیدار حل فراہم کرنا ہے۔