لاہور(ویب ڈیسک) ملک کے سب سے بڑے نجی تعلیمی نیٹ ورک بیکن ہاؤس گروپ اوراخوت فاؤنڈیشن نے اپنی انسان دوست کاوشوں میں تعاون اور نادار و ضرورتمند افراد کیلئے عطیات،کپڑے،کھلونے اور دیگر سامان جمع کرنے کیلئے باہمی مفاہمت کے ایک معاہدہ پر دستخط کئے ہیں۔
اس معاہدہ کے تحت بیکن ہاؤس گروپ،پاکستان بھر میں بیکن ہاؤس کے مختلف کیمپس میں اخوت کلاتھ بینکس(اے سی بی)کے قیام کیلئے اخوت فاؤنڈیشن کی معاونت کرے گا،اور معاشرہ کے پسماندہ افراد کی خدمت کیلئے جاری فاؤنڈیشن کے فلاحی اقدامات میں شرکت کیلئے اساتذہ اور طلباء تنظیموں کے رضاکاروں کی حوصلہ افزائی کرے گا۔
اس شراکت داری کے تحت بیکن ہاؤس گروپ نے اخوت کے متنوع خیراتی پروگرام،بشمول اخوت کلاتھ بینک اور غربت کے خاتمہ کے دیگر پروگرام سے طلباء کیلئے ایک آگاہی مہم شروع کرکے اخوت کی سماجی حمایت کا عزم کیا ہے۔اخوت کے مقصد سے متعلق آگاہی پھیلا کر بیکن ہاؤس گروپ اپنے طلباء کو سماجی طور پر زیادہ بیدار اور مساوی معاشرہ کی تشکیل کیلئے فعال کردار ادا کرنے کی ترغیب دیتا ہے۔
اخوت فاؤنڈیشن،طلباء رضا کاروں اور انٹرنز کی حوصلہ افزائی کیلئے انہیں تعریقی اسناد سے نوازے گی اور اس ضمن میں اسکولوں کے ساتھ ملکر تقاریب کا انعقاد کیا جائیگا۔
بیکن ہاؤس کے گروپ ڈائریکٹر علی رضا کا معاہدہ پر دستخط کے موقع پر کہنا تھا کہ ”یہ شراکت داری دونوں اداروں کے درمیان اہم تعاون کے آغاز کی بنیاد ہے اور میں پر امید ہوں کہ یہ مستقبل میں بہت سی مزید مشترکہ کاوشوں کا باعث بنے گا۔اس سے نہ صرف اخوت ہمارے اسکولوں اور طلباء تنظیموں کے رضا کاروں کے فزیکل لوکیشنز تک رسائی حاصل کرے گا بلکہ اس سے طلباء کے اندر ہمدردی اور سخاوت کا جذبہ بھی پروان چڑھے گا۔“
بیکن ہاؤس گروپ جیسے نجی ادارے اور ایک غیر منافع بخش تنظیم اخوت فاؤنڈیشن کے درمیان تعاون اس بات کی بہترین مثال ہے کہ سرکاری اور نجی شعبے مشترکہ مقاصد کیلئے کیسے ملکر کام کرسکتے ہیں،اپنے وسائل اور مہارت کو یکجا کرکے وہ معاشرے پر پائیدار اثرات مرتب کرسکتے ہیں اور سماجی مساوات اور غربت کے خاتمہ کے بڑے اہداف کے حصول میں کردار ادا کرسکتے ہیں۔
بیکن ہاؤس اور اخوت کے درمیان زیادہ مساوی معاشرے کی تشکیل کیلئے شراکت داری
