محکمہ موسمیات کی اسلام آباد ،کے پی اور پنجاب سمیت ملک بھرمیں موسلادھار بارش کی پیش گوئی

اسلام آباد: (ویب ڈیسک) آئندہ 24 گھنٹے کے دوران ملک کے بالائی اور مغربی علاقوں میں گرج چمک کے ساتھ بارش کا امکان ہے۔
محکمہ موسمیات کے مطابق منگل کے روز اسلام آباد ، خیبرپختونخوا، کشمیر ، گلگت بلتستان، بالائی، وسطی پنجاب اور شمال مشرقی بلوچستان میں چند مقامات پر تیز ہواؤں، آندھی اور گرج چمک کے ساتھ بارش کا امکان ہے۔ اس دوران بعض مقامات پر مو سلا دھار بارش کی بھی توقع ہے۔
گزشتہ 24 گھنٹے کے دوران ملک کے بیشترعلاقوں میں موسم خشک جبکہ وسطی، جنوبی علاقوں میں گرم رہا، تاہم خیبرپختونخوا، کشمیر، گلگت بلتستان اوربارکھان میں چند مقامات پر تیز ہواؤں اور گرج چمک کے ساتھ بارش ہوئی۔
سب سے زیادہ بارش بلو چستان میں با رکھان 11، گلگت بلتستان میں استور ، بگروٹ 07، چلاس 03، بونجی 01، خیبرپختونخوا میں پارا چنار 10 دیر (بالائی 10، زیریں 04)، کالام 05، میر کھانی 03، کاکول 02، کشمیر میں گڑھی دوپٹہ میں 01 ملی میٹر بارش ریکارڈ کی گئی۔
اس دوران ملک میں زیا دہ سے زیادہ درجہ حرارت مٹھی 43، جیکب آباد، شہید بینظیر آباد 42 اور بہاولنگر میں 41 ڈگری سینٹی گریڈ ریکارڈ کیا گیا۔