کراچی کے دکاندار تڑپ کر رہ گئے، موجودہ عید سیزن بدترین قرار

کراچی: (ویب ڈیسک) آسمانوں کو چھوتی مہنگائی عید کی خوشیاں بھی کھا گئی، کراچی کے دکاندار تڑپ کر رہ گئے، عید کے موجودہ سیزن کو ملکی تاریخ کا بدترین سیزن قرار دے دیا۔
تاجروں کا کہنا ہے کہ اس عید پر شہر میں صرف 20 ارب روپے کی خریداری ہوئی، یہ خریداری گزشتہ برسوں میں کورونا کی بندش کے دوران کی گئی شاپنگ سے بھی کم ہے، گزشتہ سال بھی 25 سے 30 ارب روپے کی خریداری کی گئی تھی۔
تاجروں نے کہا کہ دکانداروں نے عید کیلئے جو سٹاک اکٹھا کیا تھا اس کا آدھا بھی بمشکل فروخت کر پائے، شہر کے بازار عید کی روایتی گہما گہمی سے محروم رہے۔
آل کراچی تاجر اتحاد کے چیئرمین عتیق میر نے کاروباری افراد کیلئے عید کا سیزن مایوس کن قرار دے دیا اور کہا کہ عید کی 80 فیصد خریداری بچوں اور خواتین کے کم قیمت کپڑوں کی ہوئی۔