سعودی عرب میں ہنر مند پاکستانیوں کے لیے بہترین اور قابل بھروسہ ملازمت کے مواقع کھل گئے۔
اس سلسلے میں پاکستان اوورسیز ایمپلائمنٹ کارپوریشن (او ای سی) قابل اور تربیت یافتہ نرسوں کے انتخاب کے لیے رواں ماہ واک اِن انٹرویوز کرے گی تاکہ انہیں سعودی عرب بھیجا جا سکے۔
سعودی عرب کو مختلف شعبوں میں نرسنگ اسٹاف کی ضرورت ہے جن میں کارڈیک کیئر، ایمرجنسی، میڈیکل کیئر، اطفال، اہم نگہداشت، ہیموڈیالیسس، نوزائیدہ بچوں کی دیکھ بھال، آنکولوجی، سرجیکل کیئر اور انتہائی نگہداشت کے شعبہ جات شامل ہیں۔
او ای سی نے کہا تھا کہ وہ مملکت میں قابل اور تربیت یافتہ نرسیں بھیجے گا۔
سرکاری خبررساں ادارے کے مطابق ’تمام عملے کا انتخاب مختلف تاریخوں اور اسٹیشنوں پر واک ان انٹرویوز کے ذریعے کیا جائے گا’۔
چنانچہ 27 اور 28 جون کو شالیمار ٹاور ہوٹل جیل روڈ لاہور اور 2 اور 3 جولائی کو پرل کانٹینینٹل ہوٹل راولپنڈی میں انٹرویوز ہوں گے۔‘
واک ان انٹرویو کے لیے ’امیدواروں کو اپنے ساتھ اصل ڈگری/ڈپلومہ، شناختی کارڈ، سی وی اپ ڈیٹ شدہ دو عدد پاسپورٹ سائز کی تصویریں لانا ہوں گی۔‘
نرسوں کے لیے درخواست دینے کی آخری تاریخ 30 جون 2024 ہے۔
انٹرویو کے مرحلے کے بعد حتمی انتخاب کے لیے صرف اہل خواتین کو ہی مدعو کیا جائے گا جن کے پاس نرسنگ میں بیچلر آف سائنس (4 سال) یا آر این کے بعد متعلقہ شعبے میں کم از کم دو سال کا تجربہ ہو اور ان کی عمر 45 سال سے کم ہو۔
نرسوں کو کمپنی کی جانب سے متعدد سہولیات فراہم کی جائیں گی جس میں رہائش اور ٹرانسپورٹ، سعودی لیبر قانون کے مطابق وقت پر معاوضہ، ایک سال کے بعد مفت واپسی کا ٹکٹ اور ہر سال 21 دن کی چھٹیوں کی تنخواہ شامل ہے۔
پاکستان اور سعودی عرب کے درمیان مضبوط تجارتی، دفاعی اور ثقافتی تعلقات ہیں، مملکت 27 لاکھ سے زیادہ پاکستانی تارکین وطن کا گھر ہے اور ترسیلات زر کا اہم ذریعہ ہے۔
