یوکرین کے ساتھ جنگ میں مصروف روس نے کینسر کی ویکسین تیار کر لی ہے اور مفت بانٹنے کا بھی اعلان کردیا۔
روسی وزارت صحت کے مطابق یہ ویکسین کینسر ہونے سے روک نہیں سکتی مگر کینسر کے علاج میں مددگار ثابت ہوسکتی ہے، یہ ایک mRNA ویکسین ہے جو روسی عوام کیلئے مفت تقسیم کی جائے گی۔
وزارت صحت کے ریڈیولوجی میڈیکل ریسرچ سینٹر کے سربراہ آندرے کپرین نے کہا کہ ‘یہ ویکسین 2025 کے اوائل میں لانچ کردی جائے گی، اس کی ایک ڈوز پر روسی حکومت کا خرچہ 2 ہزار 869 ڈالر آئے گا لیکن اسے کینسر سے متاثرہ روسی شہریوں کیلئے مفت تقسیم کیا جائے گا۔
یہ ویکسین ہر مریض میں کینسر کی نوعیت کے مطابق دی جائے گی، تاحال یہ واضح نہیں کیا گیا کہ یہ ویکسین کس کس قسم کے کینسر کے علاج میں استعمال ہوسکتی ہے؟ کس حد تک مؤثر ہے اور کس پیمانے پر اسے تقسیم کیا جائے گا؟
حالیہ برسوں میں روس میں کینسر کی شرح میں اضافہ دیکھا گیا ہے، 2022 میں روس میں 6 لاکھ 35 ہزار سے زیادہ کیسز رپورٹ کیے گئے تھے، بڑی آنت کا کینسر، چھاتی کا کینسر اور پھیپھڑوں کا کینسر روس میں سب سے زیادہ عام ہے۔
روس کی تیار کردہ مذکورہ ‘کینسر ویکسین’ مریض کے جسم میں ٹیومر سے متاثر حصوں کو کینسر سے لڑنا سکھاتی ہے اور مدافعتی نظام کو کینسر سے نمٹنے کے قابل بناتی ہے۔
واضح رہے کہ روس پہلا ملک نہیں جہاں کینسر کی ویکسین تیار کی گئی ہے، اس سے قبل امریکہ سمیت کئی مغربی ممالک میں کینسر کی مختلف نوعیت کی ویکسینز کا تجربہ کیا جا چکا ہے۔
