مصنوعی ذہانت (اے آئی) پر مبنی چیٹ بوٹس زندگی کے کئی شعبوں میں مفید ثابت ہوسکتے ہیں لیکن ماہرین حد سے زیادہ ان چیٹ بوٹس پر انحصار سے گریز کی تجویز دیتے ہیں۔
حالیہ کچھ عرصے سے دنیا بھر میں رہنمائی اور مدد کے لیے چیٹ جی پی ٹی سمیت مصنوعی ذہانت (اے آئی) پر مبنی مختلف چیٹ بوٹس کا استعمال بہت زیادہ بڑھ گیا لیکن کئی معاملات میں یہ رجحان آپ کیلئے خطرناک بھی ثابت ہوسکتا ہے۔
آئیے ایسی 7 چیزوں کے بارے میں جانتے ہیں جن سے متعلق آپ کو چیٹ بوٹس سے کبھی بات نہیں کرنی چاہیے۔
ذاتی معلومات
کبھی بھی اپنی ذاتی معلومات اے آئی چیٹ بوٹس کے ساتھ شیئر نہ کریں، جیسے آپ کا نام، پتہ، فون نمبر یا ای میل ایڈریس وغیرہ۔
یہ معلومات آپ کی شناخت اور آپ کی سرگرمیوں کو ٹریک کرنے کے لیے استعمال کی جاسکتی ہیں۔
مالی معلومات
کبھی بھی اپنے مالی معاملات سے متعلق معلومات اے آئی چیٹ بوٹس کے ساتھ شیئر نہ کریں، مثلاً آپ کا بینک اکاؤنٹ نمبر، کریڈٹ کارڈ یا اے ٹی ایم کارڈ نمبر وغیرہ۔
یہ معلومات آپ کی محنت سے کمائی رقم چرانے کے لیے استعمال کی جا سکتی ہے۔
پاس ورڈز
اے آئی چیٹ بوٹس کے ساتھ کبھی بھی اپنے سوشل میڈیا اکاؤنٹس یا ڈیجیٹل بینک اکاؤنٹس کے پاس ورڈز شیئر نہ کریں۔
یہ معلومات آپ کے اکاؤنٹس تک رسائی اور آپ کا ڈیٹا چوری کرنے کے لیے استعمال کی جا سکتی ہیں۔
آپ کے راز
اے آئی چیٹ بوٹس کے ساتھ کبھی بھی اپنے کسی بھی قسم کے راز شیئر کرنے کی غلطی نہ کریں۔
چیٹ جی پی ٹی کوئی انسان نہیں ہے اور آپ کے راز ہمیشہ محفوظ رکھنے کے لیے اس پر بھروسہ نہیں کیا جا سکتا۔
طبی مسائل یا ادویات سے متعلق مشورہ
مصنوعی ذہانت کوئی ڈاکٹر نہیں بلکہ محض معاملات کا مجموعہ ہے، لہذا کبھی بھی اے آئی پر مبنی چیٹ بوٹس سے صحت کے مسائل یا ادویات سے متعلق مشورے نہ مانگیں۔
علاوہ ازیں کبھی بھی اپنے انشورنس نمبر سمیت ایسی کوئی بھی دیگر معلومات اے آئی سے شیئر کرنے سے گریز کریں۔
فحش مواد
زیادہ تر چیٹ بوٹس فحش گفتگو یا ایسے کسی بھی مواد کو فلٹر کردیتے ہیں، لہٰذا ایسے کسی بھی مواد کا چیٹ جی پی ٹی کے ساتھ اشتراک آپ پر پابندی کا سبب بن سکتا ہے۔
یہ یاد رکھیں کہ انٹرنیٹ کبھی بھی کچھ نہیں بھولتا، کوئی معلومات ایک بار انٹرنیٹ پر اپلوڈ ہوجائے تو ہو کسی نہ کسی شکل میں ہمیشہ وہاں موجود رہے گی، آپ کو کبھی نہیں معلوم ہوسکے گا کہ یہ کب کہاں کیسے کس صورت میں کسی کے بھی سامنے آسکتی ہے۔
کوئی بھی چیز جو آپ دنیا کے سامنے ظاہر نہیں کرنا چاہتے
یاد رکھیں کہ جو کچھ بھی آپ اے آئی چیٹ بوٹس کو بتاتے ہیں اسے کسی نہ کسی شکل میں آن لائن محفوظ کیا جا سکتا ہے اور ممکنہ طور پر کسی اور کے ساتھ شیئر بھی کیا جا سکتا ہے۔
لہٰذا آپ کو کبھی بھی اے آئی چیٹ بوٹس کو کوئی ایسی چیز نہیں بتانی چاہیے جو آپ نہیں چاہتے کہ دنیا آپ کے بارے میں جانے۔
