مجھے لاہور سے پکڑ کر لائے، چھ آدمی مجھے گاڑی میں ڈال کر لیکر آئے،15دن بعد مجھے پولیس کے حوالے کیا گیا، زور زبردستی سے لوگوں کے نام کہلوائے جارہے ہیں، پنکی کی عدالت میں چیخ و پکار
کراچی: شہر کی نامی گرامی ملزمہ انمول عرف پنکی کو جسمانی ریمانڈ مکمل ہونے پر سخت سیکیورٹی حصار میں عدالت کے روبرو پیش کر دیا گیا۔
عدالتی پیشی کے موقع پر انمول عرف پنکی نے پولیس پر سنگین الزامات عائد کرتے ہوئے دہائی دی کہ "میرے ساتھ سراسر ظلم ہوا ہے، مجھے تشدد کا نشانہ بنایا گیا اور مجھ پر جھوٹے مقدمات قائم کیے گئے ہیں”۔ ملزمہ نے عدالت کو بتایا کہ اسے لاہور سے غیر قانونی طور پر حراست میں لیا گیا اور 15 روز تک نامعلوم جگہ پر رکھنے کے بعد پولیس کے حوالے کیا گیا، جہاں 6 افراد اسے زبردستی گاڑی میں ڈال کر لائے تھے۔ اس نے مزید الزام لگایا کہ "مجھ پر بوریاں بھر بھر کر منشیات ڈالی گئی اور اب مجھ پر دباؤ ڈال کر زور زبردستی سے دیگر لوگوں کے نام کہلوائے جا رہے ہیں”۔
دوسری جانب، اسپیشل انویسٹی گیشن یونٹ (SIU) کے تفتیشی افسر بھی ریمانڈ میں توسیع کے لیے عدالت میں موجود تھے۔ تفتیشی حکام نے عدالت کو آگاہ کیا کہ ملزمہ پنکی سال 2025 کے ایک مقدمے میں اشتہاری اور مفرور تھی اور طویل عرصے سے قانون نافذ کرنے والے اداروں کو مطلوب تھی۔ پولیس کے مطابق، کارروائی کا آغاز ضلع سینٹرل سے ملزمہ کے رائڈر کی گرفتاری سے ہوا، جس کے بعد تحقیقات کا دائرہ وسیع کر کے ملزمہ تک رسائی حاصل کی گئی۔
پولیس نے عدالت سے استدعا کی کہ نیٹ ورک کے دیگر کارندوں کی گرفتاری اور اہم شواہد کے حصول کے لیے ملزمہ کا مزید جسمانی ریمانڈ منظور کیا جائے۔ تفتیشی حکام نے یہ بھی بتایا کہ ملزمہ کے خلاف شہر کے مختلف تھانوں میں مجموعی طور پر 11 مقدمات درج ہیں، جن میں مرحلہ وار ریمانڈ حاصل کرنے کی درخواستیں دائر کی جائیں گی۔ عدالت نے فریقین کے دلائل سننے کے بعد کیس پر باقاعدہ سماعت کا آغاز کر دیا، جس کے بعد ملزمہ کو سخت سیکیورٹی میں واپس منتقل کر دیا گیا۔ پولیس حکام کا کہنا ہے کہ تفتیش جاری ہے اور جلد مزید اہم پیش رفت متوقع ہے۔
