اسلام آباد: وزیرِ اعظم شہباز شریف ایک اعلیٰ سطحی وفد کے ہمراہ چار روزہ سرکاری دورے پر چین روانہ ہو گئے ہیں، جہاں وہ اپنے دورے کے پہلے مرحلے میں چینی شہر ہانگژو پہنچیں گے۔ وزیرِ اعظم کے ہمراہ جانے والے وفد میں نائب وزیرِ اعظم اسحاق ڈار، وزیرِ منصوبہ بندی احسن اقبال، وزیرِ اطلاعات عطا تارڑ، وزیرِ آئی ٹی شزہ فاطمہ اور معاونِ خصوصی طارق فاطمی سمیت اہم حکام شامل ہیں۔
ترجمان دفترِ خارجہ کی جانب سے جاری کردہ بیان کے مطابق، 26 مئی تک جاری رہنے والے اس دورے کا بنیادی محور دونوں ممالک کے مابین معاشی تعاون، سیاسی روابط اور دوطرفہ سٹریٹجک تعلقات کو مزید مستحکم کرنا ہے۔ ہانگژو میں قیام کے دوران وزیرِ اعظم ژجیانگ صوبے کے پارٹی سیکرٹری سے ملاقات کریں گے۔ اس اہم دورے کے ایجنڈے میں مشرقِ وسطیٰ کی حالیہ سنگین صورتحال بھی شامل ہے، جس پر دونوں قیادتوں کے درمیان تفصیلی تبادلہ خیال متوقع ہے۔ واضح رہے کہ چین نے اس تنازع کے حل کے لیے پاکستان کی سفارتی کوششوں کو ہمیشہ سراہا ہے۔
دوطرفہ اقتصادی شراکت داری کے حوالے سے پاکستانی وفد ‘سی پیک فیز 2’ کے فریم ورک کے تحت منعقدہ ایک بزنس فورم میں شریک ہوگا، جہاں دونوں ممالک کی کمپنیوں کے مابین تجارتی روابط بڑھانے کے لیے مختلف معاہدوں اور مفاہمتی یادداشتوں (MoUs) پر دستخط کیے جائیں گے۔
وزیرِ اعظم شہباز شریف اپنے مصروفیات کے دوران چین کی معروف کاروباری شخصیات اور کمپنیوں کے سی ای اوز سے ملاقاتیں کریں گے، اس کے علاوہ وہ چائنہ اکیڈمی آف ایگری کلچر سائنسز اور ایک معروف چینی کمپنی کے ہیڈ کوارٹر کا دورہ بھی کریں گے۔ ہانگژو کے بعد وزیرِ اعظم بیجنگ کا رخ کریں گے جہاں ان کی چینی صدر شی جن پنگ اور وزیرِ اعظم لی چیانگ سے اہم ترین ملاقاتیں شیڈول ہیں۔ اپنے اس دورے کے دوران وزیرِ اعظم پاک چین سفارتی تعلقات کے 75 سال مکمل ہونے کی یادگار تقریب میں بھی خصوصی شرکت کریں گے۔
