پنجاب میں نہروں کی صفائی کے لیے پاکستان کی پہلی اسکیمنگ بوٹ کا آغاز
پنجاب حکومت نے صوبے میں نہروں اور آبی گزرگاہوں سے پلاسٹک اور دیگر تیرتا ہوا کچرا صاف کرنے کے لیے پاکستان کی پہلی اسکیمنگ بوٹ متعارف کرا دی ہے۔
یہ جدید مشینری نہروں کی سطح پر موجود پلاسٹک، بوتلیں، اور دیگر فضلہ جمع کرنے کے لیے استعمال کی جائے گی، جس کا مقصد پانی کے نظام کو صاف رکھنا اور ماحولیاتی آلودگی میں کمی لانا ہے۔
حکام کے مطابق یہ اقدام صوبائی حکومت کے “کلین اینڈ گرین پنجاب” وژن کا حصہ ہے، جس کے تحت آبی ذخائر اور نہری نظام کی صفائی کو جدید ٹیکنالوجی سے بہتر بنایا جا رہا ہے۔
یہ بوٹ نہ صرف صفائی کے عمل کو تیز کرے گی بلکہ انسانی محنت پر انحصار بھی کم کرے گی، جس سے بڑے پیمانے پر نہروں کی مؤثر صفائی ممکن ہو سکے گی۔
ماحولیاتی ماہرین کے مطابق یہ قدم پانی کی آلودگی کم کرنے اور زرعی پانی کے معیار کو بہتر بنانے میں اہم کردار ادا کر سکتا ہے۔
