پاکستان محکمہ موسمیات (PMD) نے ملک کے مختلف حصوں میں مون سون کی ایک نئی بارشوں کی لہر داخل ہونے کی پیشگوئی کی ہے، جس کے تحت لاہور، اسلام آباد، کراچی، پشاور سمیت کئی دیگر علاقوں میں بارش، گرج چمک اور بعض مقامات پر موسلا دھار بارش کا امکان ظاہر کیا گیا ہے۔
محکمہ موسمیات کے مطابق یہ مون سون سسٹم بحیرۂ عرب اور خلیجِ بنگال سے آنے والی مرطوب ہواؤں کے باعث فعال ہوگا۔ اس کے اثرات سے پنجاب، خیبرپختونخوا، سندھ اور اسلام آباد میں وقفے وقفے سے بارشیں متوقع ہیں، جبکہ چند مقامات پر تیز ہواؤں اور آندھی کے ساتھ شدید بارش بھی ہو سکتی ہے۔
لاہور، اسلام آباد اور پشاور میں شہری علاقوں میں اربن فلڈنگ جبکہ نشیبی علاقوں میں پانی جمع ہونے کا خدشہ ظاہر کیا گیا ہے۔ دوسری جانب کراچی میں بھی مون سون بارشوں کے باعث موسم خوشگوار ہونے کے ساتھ بعض علاقوں میں شدید بارش کا امکان ہے۔
پی ایم ڈی نے عوام، متعلقہ اداروں اور سیاحوں کو احتیاطی تدابیر اختیار کرنے کی ہدایت کرتے ہوئے کہا ہے کہ شدید بارش کے دوران غیر ضروری سفر سے گریز کریں، ندی نالوں اور زیرِ آب سڑکوں سے دور رہیں، جبکہ شمالی علاقوں میں لینڈ سلائیڈنگ اور مقامی سیلاب کے خطرات کے پیش نظر خصوصی احتیاط برتی جائے۔
