یوم آزادی کے موقع پر اسلام آباد میں سٹی پریڈ کی تقریب

یومِ آزادی کے حوالے سے منعقدہ سٹی پریڈ کی تقریب میں کمشنر اسلام آباد اور آئی جی پولیس اسلام آباد کی بگھی پر سوار ہو کر آمد نے سوشل میڈیا پر نئی بحث چھیڑ دی۔ دونوں اعلیٰ سرکاری افسران کو شاہانہ انداز میں بگھی پر تقریب میں آتے دیکھ کر سوشل میڈیا صارفین کی جانب سے مختلف سوالات اور تبصرے سامنے آنے لگے۔ ذرائع کے مطابق مذکورہ بگھی پر وزیراعظم کی تقریب میں آمد متوقع تھی تاہم بعض وجوہات کی بنا پر وزیراعظم تقریب میں نہ آ سکے، جس کے بعد کمشنر اسلام آباد اور آئی جی پولیس اسلام آباد اسی بگھی پر سوار ہو کر تقریب میں پہنچے۔ افسران کی اس انداز میں آمد کی تصاویر اور ویڈیوز سوشل میڈیا پر وائرل ہونے کے بعد صارفین نے سرکاری افسران کے پروٹوکول اور عوامی نمائندگی کے انداز پر سوالات اٹھاتے ہوئے شدید ردعمل کا اظہار کیا۔ بعض صارفین کا کہنا تھا کہ سرکاری عہدہ عوامی خدمت اور سادگی کی علامت ہونا چاہیے، شاہانہ طرزِ آمد سے عوام میں مختلف تاثر پیدا ہوتا ہے۔ تاہم تقریب کے منتظمین کی جانب سے بگھی کے استعمال اور افسران کی سواری کے حوالے سے باضابطہ مؤقف سامنے نہیں آیا