راولپنڈی اور اسلام آباد میں وقفے وقفے سے جاری موسلادھار بارش کے باعث نالہ لئی میں پانی کی سطح تیزی سے بلند ہوگئی، جبکہ شہر کے مختلف نشیبی علاقوں میں پانی جمع ہونے سے شہریوں کو مشکلات کا سامنا ہے۔
رپورٹس کے مطابق کٹاریاں کے مقام پر نالہ لئی کی سطح 22 فٹ تک پہنچ گئی، جس کے بعد خطرے کے سائرن بجائے گئے اور نالے کے اطراف آبادیوں کو محتاط رہنے اور ضرورت پڑنے پر محفوظ مقامات پر منتقل ہونے کی ہدایت کی گئی۔
واسا اور ضلعی انتظامیہ نے صورتحال کے پیش نظر فیلڈ ٹیمیں اور بھاری مشینری تعینات کردی ہے، جبکہ نشیبی علاقوں سے پانی کی نکاسی کا کام جاری ہے۔ شہریوں کو نالہ لئی اور دیگر ندی نالوں کے قریب جانے سے گریز کرنے کی ہدایت کی گئی ہے۔
محکمہ موسمیات نے بھی اسلام آباد اور راولپنڈی میں مزید بارش اور گرج چمک کی پیش گوئی کرتے ہوئے خبردار کیا ہے کہ شدید بارش کی صورت میں نشیبی علاقوں، خصوصاً نالہ لئی کے اطراف، اچانک سیلابی صورتحال پیدا ہوسکتی ہے۔
