بین الاقوامی مالیاتی فنڈ (آئی ایم ایف) نے پاکستان میں بجلی کے نرخوں میں بروقت ایڈجسٹمنٹ پر زور دیتے ہوئے خبردار کیا ہے کہ توانائی کے شعبے کو بدستور شدید مالی دباؤ کا سامنا ہے۔
آئی ایم ایف کے مطابق پاکستان کے توانائی شعبے میں مالی مشکلات کم کرنے اور بڑھتے ہوئے گردشی قرضے پر قابو پانے کے لیے حکومت کو اصلاحات کے عمل میں تیزی لانا ہوگی۔
فنڈ نے بجلی کے نرخوں میں بروقت ردوبدل کو توانائی کے شعبے کی مالی پوزیشن بہتر بنانے کے لیے اہم قرار دیا ہے۔ اس کا مطلب ہے کہ آنے والے عرصے میں بجلی صارفین کو مزید مہنگے نرخوں کا سامنا کرنا پڑ سکتا ہے۔
آئی ایم ایف نے حکومت پر زور دیا ہے کہ بجلی کے شعبے میں مالی استحکام کے لیے ضروری اقدامات کیے جائیں، جبکہ گردشی قرضے میں اضافے کو روکنے کے لیے اصلاحات پر مؤثر عملدرآمد یقینی بنایا جائے۔
ماہرین کے مطابق بجلی کے نرخوں میں اضافے سے حکومت کو توانائی کے شعبے کے مالی مسائل کم کرنے میں مدد مل سکتی ہے، تاہم اس کے نتیجے میں پہلے ہی مہنگائی اور بلند بجلی بلوں سے متاثرہ عوام پر مزید مالی بوجھ پڑنے کا خدشہ ہے۔
