ایران کے وزیر داخلہ اسکندر مومنی نے پاکستان کے اعلیٰ حکام کے حالیہ دورۂ ایران اور ایرانی قیادت کے ساتھ ہونے والی ملاقاتوں کو مثبت اور تعمیری قرار دیتے ہوئے کہا ہے کہ دونوں ممالک نے باہمی تعلقات کو مزید مضبوط بنانے اور مختلف شعبوں میں تعاون کو وسعت دینے پر اتفاق کیا ہے۔
ایرانی خبر رساں ادارے ارنا کے مطابق اسکندر مومنی نے کہا کہ پاکستانی حکام کی ایرانی صدر اور دیگر اعلیٰ عہدیداروں کے ساتھ ملاقاتیں خوشگوار اور تعمیری ماحول میں ہوئیں۔ ان ملاقاتوں میں دوطرفہ تعلقات اور باہمی تعاون کے مختلف پہلوؤں پر تبادلہ خیال کیا گیا۔
ایرانی وزیر داخلہ کے مطابق پاکستان اور ایران کے درمیان موجود برادرانہ تعلقات کو مزید مستحکم کرنا دونوں ممالک کے مفاد میں ہے۔ انہوں نے کہا کہ مختلف شعبوں میں تعاون بڑھانے اور دوطرفہ روابط کو مزید فروغ دینے کے عزم کا اظہار کیا گیا۔
پاکستان کے فیلڈ مارشل عاصم منیر اور وفاقی وزیر داخلہ محسن نقوی نے پیر کی رات تہران سے واپسی اختیار کی۔ دورے کے دوران پاکستانی حکام نے ایرانی صدر مسعود پزشکیان سمیت اعلیٰ ایرانی قیادت سے اہم ملاقاتیں کیں۔
ملاقاتوں میں پاکستان اور ایران کے دوطرفہ تعلقات، علاقائی صورتحال، سکیورٹی اور باہمی تعاون سے متعلق امور زیر بحث آئے۔ حالیہ علاقائی کشیدگی کے تناظر میں پاکستانی اعلیٰ حکام کا تہران کا دورہ خاص اہمیت کا حامل قرار دیا جارہا ہے۔
پاکستان اور ایران کے درمیان طویل عرصے سے مذہبی، ثقافتی، تجارتی اور سرحدی روابط قائم ہیں۔ دونوں ممالک کے تعلقات میں سرحدی سکیورٹی، تجارت، توانائی اور علاقائی امن جیسے معاملات کو خصوصی اہمیت حاصل ہے۔
حالیہ برسوں میں دونوں ممالک نے دوطرفہ تجارت بڑھانے، سرحدی علاقوں میں سکیورٹی بہتر بنانے اور عوامی و اقتصادی روابط کو فروغ دینے کے لیے مختلف اقدامات کیے ہیں۔ موجودہ علاقائی صورتحال میں اعلیٰ سطحی رابطوں کو کشیدگی کم کرنے اور باہمی تعاون کے فروغ کے لیے بھی اہم سمجھا جارہا ہے۔
ایرانی وزیر داخلہ کی جانب سے پاکستانی حکام کی ملاقاتوں کو مثبت اور تعمیری قرار دینا اس بات کا اشارہ ہے کہ تہران اسلام آباد کے ساتھ اپنے تعلقات کو مزید بہتر بنانے اور مختلف شعبوں میں تعاون بڑھانے میں دلچسپی رکھتا ہے۔
