پشاور: ملک بھر کی طرح پشاور میں بھی عید میلاد النبی ﷺ مذہبی عقیدت و احترام اور جوش و خروش کے ساتھ منائی جا رہی ہے۔ 12 ربیع الاول کے بابرکت دن کا آغاز پشاور میں پاک فوج کی جانب سے 21 توپوں کی سلامی سے ہوا، جبکہ اس موقع پر نعرۂ تکبیر کی صدائیں بھی بلند کی گئیں۔
عید میلاد النبی ﷺ کے موقع پر پشاور کی فضا درود و سلام اور نعت خوانی کی صداؤں سے گونج رہی ہے۔ شہر کی اہم شاہراہوں، بازاروں، مساجد اور سرکاری عمارتوں کو سبز جھنڈیوں اور برقی قمقموں سے سجایا گیا ہے، جس سے شہر میں جشن کا سماں ہے۔
پشاور کے مختلف علاقوں میں محافلِ میلاد، نعت خوانی کی نشستیں اور دیگر مذہبی تقریبات کا اہتمام کیا جا رہا ہے۔ مختلف مقامات سے چھوٹے جلوس بھی نکالے جا رہے ہیں، جبکہ مرکزی جلوس ادارہ تبلیغ الاسلام کے زیر اہتمام رات عشاء کی نماز کے بعد میلاد چوک سے برآمد ہوگا اور روایتی راستوں سے ہوتا ہوا قصہ خوانی بازار پہنچے گا، جہاں مرکزی محفلِ میلاد منعقد کی جائے گی۔
مرکزی محفل میں علماء کرام اور مذہبی رہنما سیرتِ طیبہ ﷺ کے مختلف پہلوؤں پر روشنی ڈالیں گے، جبکہ نعت خواں حضرات بارگاہِ رسالت ﷺ میں عقیدت کے پھول نچھاور کریں گے۔
جشنِ میلاد النبی ﷺ کے موقع پر ملک بھر میں امن و امان برقرار رکھنے کے لیے خصوصی سیکیورٹی انتظامات بھی کیے گئے ہیں۔ پشاور میں جلوسوں کے روٹس اور حساس مقامات پر اضافی نفری تعینات کی گئی ہے تاکہ شہریوں کو محفوظ ماحول فراہم کیا جا سکے۔
ملک بھر میں عید میلاد النبی ﷺ کے موقع پر خصوصی دعاؤں، محافلِ نعت اور جلوسوں کا سلسلہ جاری ہے، جبکہ شہری نبی کریم حضرت محمد مصطفیٰ ﷺ سے اپنی عقیدت و محبت کا اظہار کر رہے ہیں۔
