پاکستان میٹرولوجیکل ڈیپارٹمنٹ (PMD) نے ملک کے مختلف علاقوں میں مون سون کے نئے اسپیل کی پیشگوئی کی ہے، جس کے باعث ہفتے کے اختتام پر بالخصوص شمالی علاقوں میں بارش کا امکان ہے۔
محکمہ موسمیات کے مطابق اسلام آباد، سوات، شانگلہ، بونیر اور ایبٹ آباد سمیت بالائی علاقوں میں مطلع جزوی طور پر ابرآلود رہنے اور گرج چمک کے ساتھ بارش متوقع ہے۔
اسلام آباد میں آج موسم گرم اور مرطوب رہنے کا امکان ہے، جہاں زیادہ سے زیادہ درجہ حرارت 36 ڈگری سینٹی گریڈ تک پہنچ سکتا ہے۔ تاہم آئندہ چند روز کے دوران دارالحکومت میں بارش متوقع ہے۔
خیبرپختونخوا کے سوات، شانگلہ، بونیر اور ایبٹ آباد میں بھی مون سون سرگرمی کے باعث بارش کا امکان ظاہر کیا گیا ہے۔ پہاڑی علاقوں میں بارش کے باعث سفر کرنے والے سیاحوں کو موسم کی تازہ صورتحال سے باخبر رہنے کی ہدایت کی گئی ہے۔
محکمہ موسمیات نے کشمیر، بالخصوص مظفرآباد اور گردونواح میں بھی بارش کی پیشگوئی کی ہے، جبکہ مالاکنڈ اور ہزارہ ڈویژن کے مختلف علاقوں میں بھی بارش ہوسکتی ہے۔
اس سے قبل محکمہ موسمیات نے بالائی پنجاب، خیبرپختونخوا، کشمیر اور گلگت بلتستان میں گرج چمک کے ساتھ بارش کی پیشگوئی کی تھی۔ بعض مقامات پر موسلادھار بارش کے باعث نشیبی علاقوں میں شہری سیلاب کا خطرہ بھی پیدا ہوسکتا ہے۔
محکمہ موسمیات نے شمالی علاقوں کا سفر کرنے والے شہریوں اور سیاحوں کو احتیاط برتنے اور سفر سے قبل تازہ ترین موسمی پیشگوئی ضرور چیک کرنے کی ہدایت کی ہے۔
#MonsoonRain #PakistanWeather #Islamabad #Swat #khabraindigital
