پنجاب بھر میں بجلی کا بحران ایک بار پھر شدت اختیار کرگیا ہے، جس کے باعث لاہور سمیت مختلف علاقوں میں لوڈشیڈنگ کا دورانیہ بڑھ گیا ہے۔ ذرائع کے مطابق متعدد پاور پلانٹس سے بجلی کی پیداوار میں اچانک کمی کے بعد صوبے میں بجلی کا شارٹ فال بڑھا ہے، جس کے نتیجے میں مختلف علاقوں میں 2 سے 3 گھنٹے تک اضافی لوڈشیڈنگ کی جارہی ہے۔
ذرائع کے مطابق ملک بھر میں بجلی کا مجموعی شارٹ فال 4 ہزار میگاواٹ سے تجاوز کرگیا ہے، جبکہ لیسکو کا شارٹ فال 1200 میگاواٹ سے زیادہ ہوگیا ہے۔ سسٹم پر دباؤ اور ٹرپنگ کے واقعات کے باعث بعض علاقوں میں غیر اعلانیہ اور طویل بجلی بندش کا سامنا ہے۔
لاہور میں شام اور رات کے اوقات میں صورتحال مزید خراب ہوجاتی ہے کیونکہ سولر پیداوار کم ہونے کے باعث بجلی کی طلب بڑھ جاتی ہے۔ ذرائع کے مطابق لیسکو کی طلب دن کے وقت تقریباً 3500 سے 3700 میگاواٹ جبکہ رات کے اوقات میں اوسطاً 5200 میگاواٹ تک پہنچ جاتی ہے۔
دوسری جانب ایل این جی کی سپلائی میں رکاوٹ کے باعث گیس سے چلنے والے پاور پلانٹس کی پیداوار مزید متاثر ہونے کا خدشہ ہے۔ ذرائع کے مطابق ایل این جی کا ایک جہاز مقررہ وقت پر بندرگاہ نہ پہنچنے سے توانائی بحران مزید سنگین ہونے کا امکان ہے۔
شدید گرمی اور حبس کے دوران طویل لوڈشیڈنگ نے شہریوں کی مشکلات میں اضافہ کردیا ہے، جبکہ مختلف علاقوں میں ٹرانسفارمرز کی خرابی اور بار بار ٹرپنگ کی شکایات بھی سامنے آرہی ہیں۔
