تازہ موسمی پیشگوئی کے مطابق پاکستان کے بالائی اور وسطی علاقوں میں 29 اگست سے 6 ستمبر تک بارش، تیز ہواؤں اور گرج چمک کا سلسلہ جاری رہنے کا امکان ہے۔ محکمہ موسمیات کے مطابق 31 اگست سے ایک مغربی ہوائی لہر بالائی علاقوں میں داخل ہوگی، جو 5 ستمبر تک بارشوں کی شدت میں اضافہ کر سکتی ہے۔ بعض مقامات پر موسلا دھار بارش بھی متوقع ہے۔
پنجاب:
لاہور، راولپنڈی، مری، گوجرانوالہ، سیالکوٹ، گجرات، جہلم، اٹک، نارووال اور دیگر بالائی و شمال مشرقی پنجاب کے علاقوں میں بارش اور گرج چمک کے امکانات ہیں۔ لاہور، راولپنڈی، مری، سیالکوٹ اور گوجرانوالہ میں بارش کا امکان خاص طور پر 5 ستمبر تک بتایا گیا ہے۔
اسلام آباد اور راولپنڈی:
اسلام آباد، راولپنڈی اور گردونواح میں بارش، تیز ہواؤں اور گرج چمک کی پیشگوئی کی گئی ہے۔ بعض مقامات پر شدید بارش کے باعث نشیبی علاقوں میں اربن فلڈنگ کا خدشہ بھی پیدا ہو سکتا ہے۔
کشمیر اور گلگت بلتستان:
کشمیر میں بارش، تیز ہواؤں اور گرج چمک کے ساتھ بعض مقامات پر شدید بارش متوقع ہے، جبکہ بارشوں کا سلسلہ 6 ستمبر تک وقفے وقفے سے جاری رہ سکتا ہے۔
خیبر پختونخوا:
خیبر پختونخوا کے مختلف علاقوں میں بھی بارش اور گرج چمک متوقع ہے، جبکہ بعض مقامات پر شدید بارش ہو سکتی ہے۔
محکمہ موسمیات کے مطابق مسلسل یا شدید بارش کے باعث اربن فلڈنگ، اچانک سیلاب اور پہاڑی علاقوں میں لینڈ سلائیڈنگ کا خطرہ بھی موجود ہے، اس لیے شہریوں کو احتیاط کی ہدایت کی گئی ہے۔
