پاکستان اور سعودی عرب نے زرعی اور غذائی تحفظ کے شعبوں میں تعاون مزید بڑھانے پر اتفاق کرتے ہوئے پاکستان کی سعودی عرب کو زرعی و غذائی مصنوعات کی برآمدات 3 ارب امریکی ڈالر تک پہنچانے کا ہدف مقرر کردیا ہے۔
اس حوالے سے دونوں ممالک کے درمیان مشترکہ اعلامیہ جاری کیا گیا، جس میں کہا گیا ہے کہ آئندہ دو سال کے دوران اس ہدف کے حصول کے لیے کوششیں کی جائیں گی۔ چاول، سرخ گوشت، پراسیسڈ فوڈ، پھل اور فروٹ کنسنٹریٹس، سبز چارہ اور پانی کے مؤثر استعمال پر مبنی زرعی ٹیکنالوجیز کو ترجیحی شعبے قرار دیا گیا ہے۔
حکومت پاکستان کی دعوت پر سعودی وزیر ماحولیات، پانی و زراعت انجینئر عبدالرحمٰن اے الفضلی کی قیادت میں سعودی وفد نے 26 سے 28 اگست 2026 تک اسلام آباد کا دورہ کیا۔ وفد میں سعودی وزارت ماحولیات، پانی و زراعت، جنرل فوڈ سکیورٹی اتھارٹی اور دیگر متعلقہ اداروں کے اعلیٰ حکام شامل تھے۔
وزیراعظم شہباز شریف نے سعودی وفد سے ملاقات کی، جس میں زرعی اور غذائی شعبوں میں ممکنہ تعاون پر تبادلہ خیال کیا گیا۔ پاکستان کی جانب سے وفد کی قیادت وفاقی وزیر قومی غذائی تحفظ و تحقیق رانا تنویر حسین نے کی۔
دورے کے دوران پاکستان-سعودی عرب ایگریکلچر اینڈ فوڈ اسٹریٹجک پلان پر بریفنگ دی گئی، جبکہ اسپیشل انویسٹمنٹ فیسیلیٹیشن کونسل (SIFC)، فوجی فاؤنڈیشن، پاکستان-سعودی عرب ایگری بزنس فورم اور نیشنل ایگریکلچرل ریسرچ سینٹر (NARC) کے حکام سے بھی ملاقاتیں ہوئیں۔
چاول کی برآمدات میں اضافے کا امکان
اعلامیے کے مطابق پاکستان نے 2025 میں سعودی عرب کو تقریباً 169 ہزار ٹن چاول فراہم کیے، جن کی مالیت تقریباً 163 ملین ڈالر تھی۔ سعودی وفد نے آنے والے برسوں میں دونوں ممالک کے درمیان چاول کی تجارت مزید بڑھانے میں دلچسپی ظاہر کی۔
سرخ گوشت کی درآمد دگنی کرنے میں دلچسپی
سرخ گوشت کے شعبے میں پاکستان نے سعودی عرب کو سالانہ تقریباً 30 ہزار ٹن گوشت فراہم کیا، جس کی مالیت تقریباً 167 ملین ڈالر ہے۔ سعودی فریق نے پاکستان سے سرخ گوشت کی درآمد بتدریج دگنی کرنے میں دلچسپی ظاہر کی۔
پھل اور پراسیسڈ فوڈ
دونوں ممالک نے سعودی مارکیٹ میں پاکستانی پھلوں اور فروٹ کنسنٹریٹس کے لیے برآمدی مواقع بڑھانے پر بھی اتفاق کیا۔ نجی شعبے کے درمیان کاروباری روابط، میچ میکنگ اور معیار سے متعلق سرٹیفکیشن کی باہمی منظوری کے لیے اقدامات کی حوصلہ افزائی کی گئی۔
سبز چارے اور زرعی ٹیکنالوجی پر بھی توجہ
سعودی عرب نے سبز چارے کو تجارت میں وسعت اور طویل المدتی سپلائی پارٹنرشپ کے لیے اہم شعبہ قرار دیا۔ دونوں جانب نے پنجاب کے ضلع بھکر میں پانی کے مؤثر استعمال پر مبنی آبپاشی پروگرام کے پہلے مرحلے کی کامیاب تکمیل کا خیرمقدم کیا۔
دونوں ممالک نے لائیو اسٹاک، ایگری فوڈ پراسیسنگ اور چاول کی ویلیو چین میں پاکستانی نجی شعبے کی سرمایہ کاری تجاویز کا بھی جائزہ لیا اور تعاون جاری رکھنے پر اتفاق کیا۔
اعلامیے میں دونوں ممالک نے اپنے تاریخی اور برادرانہ تعلقات کا اعادہ کرتے ہوئے سعودی وژن 2030 اور پاکستان کے زرعی و غذائی برآمدی شعبے کے درمیان ہم آہنگی کو بھی اجاگر کیا۔
سعودی عرب میں ہونے والی 43ویں سعودی ایگریکلچر نمائش میں پاکستان کی شرکت کی دعوت کا بھی خیرمقدم کیا گیا، جو 19 سے 22 اکتوبر 2026 کو ریاض میں منعقد ہوگی۔
