مہنگائی سے پریشان عوام پر ایک اور بوجھ ڈال دیا گیا، نیشنل الیکٹرک پاور ریگولیٹری اتھارٹی (نیپرا) نے ملک بھر میں بجلی کے نرخوں میں مجموعی طور پر 2.58 روپے فی یونٹ اضافہ کردیا۔
نیپرا کے مطابق جولائی 2026 کی ماہانہ فیول کاسٹ ایڈجسٹمنٹ کے تحت بجلی کی قیمت میں 2.06 روپے فی یونٹ اضافہ کیا گیا ہے، جس کا اضافی بوجھ صارفین پر تقریباً 33 ارب روپے پڑے گا۔ یہ اضافہ ستمبر 2026 کے بجلی کے بلوں میں شامل کیا جائے گا۔
اس کے علاوہ اپریل سے جون 2026 کی سہ ماہی ایڈجسٹمنٹ کے تحت بجلی کی قیمت میں مزید 52 پیسے فی یونٹ اضافے کا فیصلہ کیا گیا ہے۔ یہ اضافہ ستمبر سے نومبر 2026 تک تین ماہ کے لیے لاگو ہوگا اور کے الیکٹرک صارفین بھی اس سے متاثر ہوں گے۔
نیپرا کے مطابق سہ ماہی ایڈجسٹمنٹ سے صارفین پر مزید 12 ارب 67 کروڑ روپے کا مالی بوجھ پڑے گا۔ دونوں ایڈجسٹمنٹس ملا کر صارفین پر مجموعی اضافی بوجھ تقریباً 45 ارب 67 کروڑ روپے بنتا ہے۔
یوں پیٹرولیم مصنوعات کی قیمتوں میں اتار چڑھاؤ کے بعد بجلی کے نرخوں میں تازہ اضافہ بھی شہریوں کے لیے ماہانہ گھریلو بجٹ پر مزید دباؤ کا باعث بنے گا
