رحیم یار خان کے شیخ زاید اسپتال کے آپریشن تھیٹر میں آج اچانک آگ بھڑک اٹھی۔ ابتدائی اطلاعات کے مطابق آگ شارٹ سرکٹ کے باعث لگی۔ بروقت کارروائی کرتے ہوئے ریسکیو 1122 کی ٹیمیں تقریباً 2 منٹ میں موقع پر پہنچیں اور 10 منٹ میں آگ پر قابو پالیا۔
واقعے کے وقت آپریشن تھیٹر میں موجود مریضوں کو فوری طور پر محفوظ مقام پر منتقل کردیا گیا۔ حکام کے مطابق آتشزدگی میں کوئی جانی یا مالی نقصان نہیں ہوا۔
واقعے کے بعد اسپتال کے مختلف حصوں میں دھواں پھیل گیا، تاہم ریسکیو اہلکاروں نے آگ کو دیگر وارڈز تک پھیلنے سے روک دیا۔ اسپتال انتظامیہ کے مطابق صورتحال پر فوری قابو پالیا گیا۔
ڈپٹی کمشنر رحیم یار خان ظہیر انور جپہ نے واقعے کا نوٹس لیتے ہوئے فوری رپورٹ طلب کرلی اور اسسٹنٹ کمشنر کو موقع پر پہنچ کر صورتحال کا جائزہ لینے کی ہدایت کی۔ واقعے کی وجوہات اور اسپتال کے فائر سیفٹی انتظامات کا بھی جائزہ لیا جا رہا ہے۔
یہ واقعہ اسلام آباد کے پمز اور لاہور کے جنرل اسپتال میں حالیہ آتشزدگی کے واقعات کے بعد سامنے آیا ہے، جس کے باعث اسپتالوں میں فائر سیفٹی انتظامات پر ایک بار پھر سوالات اٹھ رہے ہیں۔
