پاکستانی موسیقی کی دنیا میں معروف گانا ’’پسوری‘‘ نے ایک اور تاریخی سنگِ میل عبور کر لیا ہے۔ علی سیٹھی اور شائے گل کا یہ مقبول گانا یوٹیوب پر ایک ارب سے زائد ویوز حاصل کرنے والی پہلی پاکستانی میوزک ویڈیو بن گیا ہے۔
’’پسوری‘‘ کوک اسٹوڈیو پاکستان سیزن 14 کا حصہ تھا اور 2022 میں ریلیز کیا گیا۔ گانے نے ریلیز کے بعد پاکستان سمیت دنیا بھر میں غیر معمولی مقبولیت حاصل کی اور اس کے منفرد میوزک، پنجابی شاعری اور جدید و روایتی دھنوں کے امتزاج نے اسے عالمی سطح پر بھی شہرت دلائی۔
یہ گانا علی سیٹھی اور شائے گل نے گایا، جبکہ اس کی پروڈکشن اور تخلیقی ٹیم میں زلفی (Xulfi) سمیت کئی فنکار شامل تھے۔ ’’پسوری‘‘ کی کامیابی نے شائے گل کو بھی بین الاقوامی سطح پر نمایاں شناخت دلائی۔
رپورٹس کے مطابق ’’پسوری‘‘ کوک اسٹوڈیو کا پہلا گانا بھی ہے جس نے یوٹیوب پر ایک ارب ویوز کا ہندسہ عبور کیا، جبکہ یہ کوک اسٹوڈیو کی تاریخ میں سب سے زیادہ دیکھی جانے والی میوزک ویڈیو بن چکی ہے۔
