حیدرآباد، ملتان، لاہور، فیصل آباد اور کراچی موسمیاتی خطرات میں دنیا کے کمزور ترین شہروں میں شامل
ایک نئی عالمی رپورٹ میں پاکستان کے پانچ بڑے شہروں حیدرآباد، ملتان، لاہور، فیصل آباد اور کراچی کو موسمیاتی خطرات سے نمٹنے کی صلاحیت کے اعتبار سے دنیا کے کمزور ترین بڑے شہروں میں شامل کیا گیا ہے۔
جغرافیائی تجزیاتی کمپنی AlphaGeo کی جانب سے جاری جائزے میں دنیا کے 72 بڑے شہروں کا موسمیاتی خطرات اور ان سے نمٹنے کی صلاحیت کی بنیاد پر جائزہ لیا گیا۔ رپورٹ میں صرف قدرتی خطرات کا جائزہ نہیں لیا گیا بلکہ شہروں کی موافقت اور حفاظتی اقدامات کو بھی مدنظر رکھا گیا۔
رینکنگ کے مطابق حیدرآباد دوسرے، ملتان تیسرے، لاہور پانچویں، فیصل آباد ساتویں اور کراچی آٹھویں نمبر پر رہے۔ بھارت کا شہر احمد آباد دنیا کا سب سے کم موسمیاتی لچک رکھنے والا شہر قرار پایا۔
رپورٹ کے مطابق جنوبی ایشیا کے شہر خاص طور پر شدید گرمی، سیلاب اور مون سون سے متعلق خطرات کی زد میں ہیں، جبکہ کئی شہروں میں ان خطرات سے نمٹنے کے لیے موافقت اور بنیادی ڈھانچے کی بہتری کی رفتار خطرات کے مقابلے میں کم ہے۔
رپورٹ میں بتایا گیا کہ احمد آباد، حیدرآباد، ملتان، ڈھاکا، کولکاتا اور لاہور مجموعی موسمیاتی خطرے کے لحاظ سے سب سے زیادہ متاثرہ بڑے شہروں میں شامل ہیں، جس میں شدید گرمی کو ایک اہم عنصر قرار دیا گیا ہے۔
AlphaGeo کے مطابق زیادہ موسمیاتی خطرات اور کمزور موافقت کا یہ فرق مستقبل میں انفراسٹرکچر، جائیدادوں، کاروباری سرگرمیوں اور ہنگامی صورتحال سے نمٹنے کے سرکاری اخراجات پر نمایاں اثر ڈال سکتا ہے۔ پاکستان اور بنگلہ دیش کو خاص توجہ کے مستحق ممالک قرار دیا گیا ہے۔
