اسلام آباد کی ضلعی انتظامیہ نے شہریوں کی جانوں کو لاحق خطرات کے پیش نظر وفاقی دارالحکومت کے مختلف ڈیموں، دریاؤں اور ندی نالوں میں تیراکی پر دو ماہ کے لیے پابندی عائد کردی۔
ایڈیشنل ڈسٹرکٹ مجسٹریٹ اسلام آباد ڈاکٹر انعم فاطمہ کی جانب سے 8 ستمبر 2026 کو جاری حکم نامے کے تحت راول ڈیم، سملی ڈیم، سوان دریا، کورنگ نالہ، انگوری روڈ نالہ، چتر پارک نالہ، شاہدرہ اور سنڈے مار ڈیم سمیت دیگر ندی نالوں میں تیراکی ممنوع قرار دی گئی ہے۔
انتظامیہ کے مطابق ان مقامات پر لوگوں کے تیراکی کرنے کی اطلاعات موصول ہوئی تھیں، جسے انسانی جانوں کے لیے انتہائی خطرناک قرار دیا گیا۔ پابندی ضابطہ فوجداری کی دفعہ 144 کے تحت نافذ کی گئی ہے اور فوری طور پر مؤثر ہوگی۔
حکام نے متعلقہ اداروں کو پابندی پر عملدرآمد یقینی بنانے اور خلاف ورزی کرنے والوں کے خلاف قانون کے مطابق کارروائی کی ہدایت بھی کی ہے۔ حکم نامے کی تشہیر سرکاری گزٹ، اخبارات اور دیگر ذرائع ابلاغ کے ذریعے کرنے کے ساتھ ساتھ پولیس اسٹیشنز اور دیگر نمایاں مقامات پر بھی آویزاں کرنے کی ہدایت دی گئی ہے۔
