نیشنل ڈیزاسٹر مینجمنٹ اتھارٹی (NDMA) نے ملک کے مختلف علاقوں میں 17 ستمبر تک بارشوں کے باعث سیلاب اور شہری سیلاب کے خدشے کے پیش نظر الرٹ جاری کردیا ہے۔ این ڈی ایم اے کے مطابق بالائی علاقوں میں ہونے والی بارشوں سے دریاؤں، ندی نالوں اور مقامی نالوں میں پانی کی سطح بڑھ سکتی ہے۔
این ڈی ایم اے کے مطابق گلگت بلتستان کے گلگت، دیامر، غذر، ہنزہ اور اسکردو سمیت متعدد علاقوں میں فلیش فلڈ کا خدشہ ہے، جبکہ خیبر پختونخوا میں اپر دیر، سوات، باجوڑ، ملاکنڈ، کرم، کوہستان، مہمند اور اورکزئی متاثر ہوسکتے ہیں۔
پنجاب میں راولپنڈی، گوجرانوالہ، سرگودھا، جھنگ، ٹوبہ ٹیک سنگھ اور شیخوپورہ میں شہری سیلاب کا خدشہ ظاہر کیا گیا ہے۔ بلوچستان کے ژوب، شیرانی اور موسیٰ خیل میں بھی سیلابی صورتحال پیدا ہونے کا امکان ہے۔
این ڈی ایم اے نے متعلقہ اداروں کو پیشگی اقدامات کی ہدایت کرتے ہوئے شہریوں کو زیرِ آب سڑکوں، ندی نالوں، پلوں اور نشیبی راستوں سے گزرنے سے گریز کرنے کا مشورہ دیا ہے۔
پاکستان میٹرولوجیکل ڈیپارٹمنٹ کے فلڈ فورکاسٹنگ ڈویژن کے مطابق 15 سے 18 ستمبر کے دوران دریاؤں کے بالائی علاقوں میں بارشوں کے باعث اہم دریاؤں اور ملحقہ نالوں کے بہاؤ میں قدرے اضافے کا امکان ہے۔
