شہرِ قائد میں پیر کے روز درجہ حرارت 41 ڈگری سینٹی گریڈ تک پہنچ گیا، جو گزشتہ 10 برس کے دوران ستمبر میں کراچی کا سب سے زیادہ درجہ حرارت ہے۔ پاکستان میٹ ڈیپارٹمنٹ کے مطابق شہر شدید گرم اور مرطوب موسم کی لپیٹ میں رہا۔
محکمہ موسمیات کے مطابق کراچی میں ستمبر کا اب تک کا بلند ترین درجہ حرارت 43 ڈگری سینٹی گریڈ ہے، جو 30 ستمبر 1951 کو ریکارڈ کیا گیا تھا، جبکہ 2015 میں درجہ حرارت 42.7 ڈگری تک پہنچا تھا۔
شہر کے مختلف علاقوں میں بھی شدید گرمی ریکارڈ کی گئی، جناح ٹرمینل پر درجہ حرارت 41.2 ڈگری جبکہ گلستانِ جوہر میں 41 ڈگری ریکارڈ ہوا۔
محکمہ موسمیات کے چیف میٹرولوجسٹ امیر حیدر لغاری کے مطابق مسلسل کم دباؤ کے باعث سمندری ہوائیں متاثر ہوئیں، جس سے کراچی میں گرمی اور حبس میں اضافہ ہوا۔ تاہم کم دباؤ کا نظام کمزور ہونے کے بعد درجہ حرارت میں کمی متوقع ہے۔
محکمہ موسمیات کے مطابق منگل کو کراچی میں زیادہ سے زیادہ درجہ حرارت 36 سے 38 ڈگری کے درمیان رہنے کا امکان ہے، جبکہ بدھ سے گرمی کی شدت میں مزید کمی متوقع ہے۔
