لاہور (کرائم رپورٹر) ڈی آئی جی آپریشنز فیصل کامران نے فیس بک لائیو پرکھلی کچہری کا انعقاد کیا۔
فیس بک لائیو میں ٹرانس جینڈر ہنی ٹریپ کی شکایت پر ڈی آئی جی آپریشنز نے فوری ردعمل کرتے ہوئے شہری کو کارروائی کی یقین دہانی کروا دی۔ فیصل کامران نے کہا کہ فریب کا جال بچھا کر شہریوں کو لوٹنے والوں کا انجام گرفتاری ہوگا۔ انہوں نے کہا کہ ون ویلنگ اور تیز رفتاری جان لیوا کھیل ہیں۔ نوجوان خطرناک کرتب سے باز رہیں۔ ون ویلنگ اور خطرناک ڈرائیونگ سے اپنی اور دوسروں کی جان خطرے میں نہ ڈالیں۔ ڈی آئی جی آپریشنز نے کہا کہ خطرناک ڈرائیونگ کی ویڈیوز سوشل میڈیا پر اپ لوڈ کرکے ایسے رجحانات کی حوصلہ افزائی نہ کریں۔ فیصل کامران نے کہا کہ پتنگوں اور ڈور کی غیر قانونی فروخت و ترسیل کے خلاف پولیس کا کریک ڈائون جاری ہے۔ ضلعی انتظامیہ کی اجازت کے بغیر پتنگوں اور ڈور کی فروخت و ترسیل غیر قانونی ہے۔ لاہور کے داخلی و خارجی راستوں پر پولیس الرٹ ہے جو کہ پتنگوں اور ڈور کی غیر قانونی ترسیل پر کڑی نظر رکھے ہوئے ہے۔ شادباغ اور فیکٹری ایریا کے ایس ایچ اوز کے خلاف شکایات پر ڈی آئی جی آپریشنز نے معاملہ خود دیکھنے کا فیصلہ کیا۔ ڈی آئی جی آپریشنز نے کہا کہ شہریوں کی شکایات کو سنجیدگی سے لیا جا رہا ہے، غفلت یا نااہلی پر کارروائی ہوگی۔ انہوں نے کہا کہ عوام ہماری آنکھیں اور کان ہیں، شہریوں کی نشاندہی سے جرائم کی روک تھام میں مدد ملتی ہے۔ فیصل کامران نے کہا کہ مثبت عوامی فیڈ بیک پولیس کی حوصلہ افزائی کرتا ہے۔ لاہور پولیس شہریوں کے مسائل کے حل اور فوری انصاف کی فراہمی کیلئے پرعزم ہے۔ ڈی آئی جی آپریشنز نے کہا کہ لاہور سے باہر کے شہری اپنی شکایات کیلئے متعلقہ ڈی پی اوز اور آر پی اوز سے رابطہ کریں۔
