گورنر سندھ سے ایم ڈی پاکستان بیت المال کی ملاقات

کراچی (این این آئی)گورنر سندھ سید محمد نہال ہاشمی سے پاکستان بیت المال کے مینجنگ ڈائریکٹر
سنیٹر کیپٹن (ر) شاہین خالد بٹ نے گورنر ہائوس میں ملاقات کی۔ ملاقات میں مستحق، نادار، یتیم اور ضرورت مند افراد کی فلاح و بہبود، معاونت اور بحالی سے متعلق مختلف امور پر تفصیلی تبادلہ خیال کیا گیا۔ اس موقع پر گورنر سندھ سید محمد نہال ہاشمی نے کہا کہ پاکستان بیت المال مستحق، یتیم، بیوائوں اور معاشرے کے کمزور طبقات کی معاونت میں اہم کردار ادا کر رہا ہے۔ انہوں نے مستحق افراد کو طبی، تعلیمی اور مالی معاونت کی فراہمی کو قابلِ تحسین قرار دیتے ہوئے کہا کہ ایسے فلاحی پروگرامز معاشرے میں امید اور خود اعتمادی کو فروغ دیتے ہیں۔ گورنر سندھ نے کہا کہ مستحق افراد کی بحالی اور انہیں باعزت زندگی گزارنے کے قابل بنانا ہم سب کی اجتماعی ذمہ داری ہے۔ انہوں نے اس امر پر زور دیا کہ تعلیم، علاج اور مالی معاونت کے مختلف پروگرامز کے ذریعے زیادہ سے زیادہ ضرورت مند افراد تک سہولیات پہنچائی جائیں تاکہ وہ بہتر زندگی گزار سکیں۔ ملاقات کے دوران مینجنگ ڈائریکٹر پاکستان بیت المال سنیٹر کیپٹن (ر) شاہین خالد بٹ نے ادارے کی جاری فلاحی سرگرمیوں اور مختلف پروگرامز کے بارے میں بریفنگ دیتے ہوئے بتایا کہ انفرادی مالی معاونت پروگرام کے تحت مستحق افراد کو مالی امداد فراہم کی جارہی ہے۔ انہوں نے کہا کہ سویٹ ہومز پروگرام کے ذریعے یتیم بچوں کی کفالت، تعلیم و تربیت اور بہتر مستقبل کے لیے موثر اقدامات کیے جا رہے ہیں جبکہ خواتین بااختیاری مراکز کے ذریعے مستحق خواتین کو مختلف ہنر سکھا کر روزگار کے مواقع فراہم کیے جارہے ہیں تاکہ وہ معاشی طور پر خودمختار بن سکیں۔ ملاقات میں باہمی دلچسپی کے دیگر امور پر بھی گفتگو کی گئی اور فلاحی خدمات کے دائرہ کار کو مزید وسعت دینے کے عزم کا اظہار کیا گیا۔