پنوعاقل میں بزرگ مویشی تاجر دریا میں ڈوب کر جاں بحق، گھنٹوں بعد نعش برآمد

پنوعاقل (این این آئی) پنوعاقل کے کچے کے علاقے میں حفاظتی بند کے قریب دریا میں ڈوبنے والے بزرگ مویشی تاجر سائیں داد جتوئی کی نعش
گھنٹوں کی تلاش کے بعد برآمد کر لی گئی جبکہ واقعے پر علاقے میں غم کی فضا چھا گئی۔ تفصیلات کے مطابق نواحی گائوں وریام جتوئی کے رہائشی بزرگ مویشی تاجر سائیں داد جتوئی حفاظتی بند کے قریب دریا میں ڈوب گئے تھے جس کے بعد ورثا اور مقامی افراد نے فوری طور پر تلاش کا عمل شروع کر دیا۔ کئی گھنٹوں کی مسلسل جدوجہد کے بعد مقامی لوگوں نے اپنی مدد آپ کے تحت نعش دریا سے نکال لی۔ نعش برآمد ہونے کے بعد اسے آبائی گائوں منتقل کیا گیا جہاں گھر پہنچنے پر کہرام مچ گیا اور اہل خانہ پر غم کا پہاڑ ٹوٹ پڑا۔ واقعے کی اطلاع ملتے ہی جتوئی برادری، عزیز و اقارب اور علاقہ مکینوں کی بڑی تعداد تعزیت کے لیے متاثرہ خاندان کے گھر پہنچ گئی۔ سائیں داد جتوئی کے انتقال کی خبر سے علاقے میں شدید رنج و غم کی لہر دوڑ گئی ہے اور مقامی افراد نے مرحوم کی مغفرت اور پسماندگان کے لیے صبر جمیل کی دعا کی ہے۔