امریکی انتخابات کی آمد’میری لینڈ میں سیاسی سرگرمیاں تیز

واشنگٹن ( فضل خالق) امریکہ میں 3 نومبر2026 ء کو ہونے والے عام انتخابات میں تقریبا ایک ماہ باقی رہ جانے کے ساتھ ملک بھر میں سیاسی سرگرمیوں میں تیزی آرہی ہے۔ روایتی طور پر ڈیموکریٹک جھکا رکھنے والی ریاست میری لینڈ میں بھی انتخابی ماحول نمایاں ہوتا جارہا ہے جہاں سیاسی، سماجی اور کاروباری حلقوں میں آئندہ انتخابات اور دونوں بڑی جماعتوں کی حکمتِ عملی پر گفتگو جاری ہے۔ اسی تناظر میں میری لینڈ کی معروف کاروباری، سماجی اور سیاسی شخصیات کے درمیان ایک اہم نشست ہوئی، جس میں سابق سٹیٹ سینیٹ امیدوار الیاس چوہان، معروف کاروباری شخصیت رئوف خان اور مذہبی، سماجی و کاروباری حلقوں کی نمایاں شخصیت حافظ حبیب اللہ نے شرکت کی۔ نشست کے دوران امریکہ کے موجودہ سیاسی منظرنامے، ڈیموکریٹک اور ریپبلکن جماعتوں کی انتخابی حکمتِ عملی، ووٹرز تک رسائی، کمیونٹی کی سیاسی شمولیت اور انتخابات پر اثرانداز ہونے والے اہم قومی و مقامی معاملات پر تفصیلی تبادلہ خیال کیا گیا۔ شرکا نے اس امر پر بھی گفتگو کی کہ دونوں بڑی سیاسی جماعتیں ووٹرز کی حمایت حاصل کرنے کے لیے کس نوعیت کی انتخابی حکمتِ عملی اختیار کر رہی ہیں اور میری لینڈ سمیت مختلف ریاستوں میں مقامی کمیونٹیز کا کردار کس طرح اہمیت اختیار کر رہا ہے۔ خصوصی گفتگو میں پاکستانی نژاد امریکی کمیونٹی کی سیاسی شرکت بھی زیرِ بحث آئی۔ شرکا نے کمیونٹی کے افراد کی انتخابی عمل میں شرکت، مقامی اور ریاستی سطح پر سیاسی رابطوں اور اپنے شہری و جمہوری حقوق کے استعمال کی اہمیت سے متعلق مختلف پہلوئوں پر اظہارِ خیال کیا۔ اس موقع پر صحافی فضل خالق نے الیاس چوہان، رئوف خان اور حافظ حبیب اللہ سے خصوصی انٹرویوز کیے، جن میں ان سے موجودہ انتخابی ماحول، ڈیموکریٹک اور ریپبلکن جماعتوں کی انتخابی سرگرمیوں، ووٹرز کے رجحانات اور انتخابات کے تناظر میں پاکستانی نژاد امریکی کمیونٹی کے کردار کے بارے میں سوالات کیے گئے۔ امریکی انتخابات قریب آنے کے ساتھ میری لینڈ میں سیاسی سرگرمیوں میں مزید تیزی متوقع ہے جبکہ دونوں بڑی جماعتیں مختلف طبقات اور کمیونٹیز تک رسائی کے لیے اپنی انتخابی مہم جاری رکھے ہوئے ہیں۔