ایف بی آئی آفس ہیک کرنے والے گروپ کا رکن’ اردن میں گرفتار

واشنگٹن (این این آئی) باخبر ذرائع نے بتایا ہے کہ اردن نے چند روز قبل سائبر حملہ کرنے والے
گروپ چائنی ہنٹرز کے ایک اہم رکن کو حراست میں لے لیا ہے جس نے امریکی فیڈرل بیورو آف انوسٹی گیشن یعنی ایف بی آئی کے تمام ملازمین کا ڈیٹا چرانے کا اعلان کیا تھا۔ دو ذرائع نے بتایا کہ وہ سائبر ہیکرز کے اپنے ساتھیوں کی شناخت ظاہر کرنے کے لیے ایف بی آئی کے ساتھ تعاون کر رہا ہے۔ تینوں ذرائع نے بتایا کہ اردن کے حکام نے سیف الدین خضر کو حراست میں لے لیا ہے۔ دو ذرائع نے واضح کیا کہ وہ منگل کے روز سے زیر حراست ہے۔ ذرائع کا کہنا تھا کہ وہ باقی ہیکرز کے ٹھکانوں کا پتہ لگانے کے لیے ایف بی آئی اور دوسرے ممالک کے قانون نافذ کرنے والے اداروں کے ساتھ تعاون کر رہا ہے۔