حکومت برآمدات میں اضافے پر وزیرِ اعظم کی خصوصی توجہ قابلِ تحسین

کراچی (این این آئی) آل پاکستان ایکسپورٹرز ایسوسی ایشنز فورم کے چیف کوآرڈینیٹر محمد جاوید بِلوانی نے وزیرِ اعظم میاں محمد شہباز شریف کی جانب سے برآمدات اور صنعتی ترقی پر خصوصی توجہ کو سراہتے ہوئے کہا ہے کہ برآمد کنندگان اور حکومت کے درمیان باقاعدہ مشاورتی اجلاس صنعتی مسائل کے حل اور پاکستان کی برآمدی مسابقت کو مضبوط بنانے میں اہم کردار ادا کر سکتے ہیں۔ میڈیا کو جاری اپنے بیان میں جاوید بِلوانی نے کہا کہ یکم اکتوبر 2026 کو پاکستان سٹاک ایکسچینج میں وزیرِ اعظم کے خطاب کے دوران بعض مخصوص برآمدی شعبوں کی مطلوبہ کارکردگی کا ذکر کیا گیا، تاہم بعض حلقوں میں یہ تاثر پیدا ہوا کہ پوری برآمدی صنعت برآمدات بڑھانے میں ناکام رہی ہے، جو حقائق کی درست عکاسی نہیں کرتا۔ انہوں نے کہا کہ وزیرِ اعظم نے ہمیشہ برآمدات پر مبنی صنعتی ترقی کو ترجیح دی ہے اور برآمدی شعبے کے نمائندوں کے ساتھ مسلسل رابطے اور مشاورت کو فروغ دیا ہے۔ ان کا کہنا تھا کہ پاکستان کی مجموعی برآمدی کارکردگی گزشتہ برسوں میں نمایاں طور پر بہتر ہوئی ہے۔ مالی سال 2015-16 میں قومی برآمدات 20.787 ارب امریکی ڈالر تھیں جو مالی سال 2025-26 میں بڑھ کر 30.139 ارب امریکی ڈالر تک پہنچ گئیں، جو تقریبا 45 فیصد اضافہ ہے۔