حسن ابدال: دو افراد گلے کاٹ کر قتل، لاشیں سڑک کنارے سے برآمد

حسن ابدال (نمائندہ خبریں) حسن ابدال کے نواحی علاقے میں دو افراد کو مبینہ طور پر گلے کاٹ کر قتل کر دیا گیا، دونوں کی لاشیں سڑک کنارے سے برآمد ہونے پر علاقے میں خوف و ہراس پھیل گیا۔پولیس رپورٹ کے مطابق واقعہ 5 اکتوبر 2026 کو صبح تقریباً 9 بجے پیش آیا، جب حسن ابدال کے گاؤں پوڑ میانہ کی جانب جانے والی سڑک کے قریب دو افراد کی لاشیں پڑی ہونے کی اطلاع ملی۔اطلاع ملتے ہی تھانہ صدر حسن ابدال پولیس موقع پر پہنچ گئی۔ پولیس کے مطابق دونوں افراد کو تیز دھار آلہ سے گلے کاٹ کر قتل کیا گیا۔پولیس نے مقتولین کی شناخت 25، 26 سالہ زیشان ولد امیر افضل، سکنہ قندہاری پور حسن ابدال اور 30 سالہ جواد ولد نامعلوم سکنہ بجاڑ تحصیل ٹیکسلا ضلع راولپنڈ ی کے نام سے کی ہے۔پولیس نے لاشوں کو اپنی تحویل میں لے کر ضروری قانونی کارروائی شروع کر دی ہے، جبکہ واقعے کے محرکات اور قتل میں ملوث ملزمان کے حوالے سے تحقیقات جاری ہیں۔پولیس ذرائع کے مطابق جائے وقوعہ سے شواہد اکٹھے کیے جا رہے ہیں اور مختلف پہلوؤں سے تفتیش کی جا رہی ہے تاکہ دونوں افراد کے قتل کی وجوہات اور ملزمان تک پہنچا جا سکے۔دو افراد کے بہیمانہ قتل کی اطلاع ملنے پر علاقے میں تشویش کی لہر دوڑ گئی۔ پولیس کا کہنا ہے کہ واقعے کی مزید تفتیش اور قانونی کارروائی جاری ہے جبکہ ملزمان کی گرفتاری کے لیے بھی اقدامات کیے جا رہے ہیں۔