مذاکرات کے تمام دروازے کھلے رکھے گئے: بیرسٹر دانیال

اسلام آباد (نامہ نگار خصوصی )وفاقی پارلیمانی
سیکرٹری برائے اطلاعات و نشریات بیرسٹر دانیال چوہدری نے کہا ہے کہ حکومت مفاہمت کی پالیسی پر یقین رکھتی ہے اور سیاسی معاملات کو بات چیت اور مذاکرات کے ذریعے حل کرنے کے لیے سنجیدہ کوششیں کرتی رہی ہے۔پیر کو وزیر اعظم کے کوآرڈینیٹر اختیار ولی خان کے ہمراہ نیوز کانفرنس سے خطاب کرتے ہوئے انہوں نے کہا کہ حکومت نے مکمل خلوص کے ساتھ پی ٹی آئی کو مذاکرات کے لیے مدعو کیا اور معاملات کو خوش اسلوبی سے حل کرنے کی حتی الامکان کوشش کی۔ مذاکراتی عمل میں پی ٹی آئی قیادت کے متعدد نمائندے بھی شریک رہے، تاہم پی ٹی آئی نے جان بوجھ کر مذاکراتی عمل کو سبوتاژ کیا۔انہوں نے کہا کہ حکومت تمام سیاسی قوتوں کو ساتھ لے کر چلنے کے لیے تیار ہے اور سیاسی اختلافات کو جمہوری انداز میں بات چیت اور مفاہمت کے ذریعے حل کرنے پر یقین رکھتی ہے۔ انہوں نے کہا کہ پی ٹی آئی میں مذاکرات کے حوالے سے واضح قیادت کا فقدان رہا جبکہ حکومت نے مذاکراتی عمل کو آگے بڑھانے کے لیے سنجیدگی کا مظاہرہ کیا۔بیرسٹر دانیال چوہدری نے کہا کہ بعض عناصر عوام کو گمراہ کرنے کی کوشش کر رہے ہیں اور نفرت و تفریق کی سیاست کو فروغ دے رہے ہیں۔ حکومت قومی مفاد میں سیاسی استحکام، قومی یکجہتی اور جمہوری اقدار کے فروغ کے لیے تمام فریقین سے مشاورت جاری رکھنے کے لیے تیار ہے۔خیبر پختونخوا میں پی ٹی آئی کی حکومت کی کارکردگی کے حوالے سے انہوں نے کہا کہ گزشتہ 15 سال کے دوران صوبے میں گورننس، عوامی مسائل کے حل اور امن و امان کی صورتحال پر سنجیدہ سوالات اٹھتے رہے ہیں۔ انہوں نے کہا کہ صوبے میں کرپشن کا بازار گرم رہا جبکہ عوام کو بنیادی سہولیات کی فراہمی اور انتظامی امور میں مطلوبہ بہتری نہیں لائی جا سکی۔انہوں نے کہا کہ خیبر پختونخوا میں دہشت گردی کے دو ہزار سے زائد واقعات ہوئے جبکہ 72 سے زائد اہلکار دہشت گردی کی کارروائیوں میں جاں بحق ہوئے۔ انہوں نے کہا کہ دہشت گردی کے خلاف جنگ میں قانون نافذ کرنے والے اداروں کے اہلکاروں اور عوام نے بے شمار قربانیاں دی ہیں، اس لیے دہشت گردی کے خاتمے اور ملک میں امن و استحکام کے لیے قومی سطح پر مشترکہ کوششوں کی ضرورت ہے۔بیرسٹر دانیال چوہدری نے کہا کہ حکومت سیاسی اختلافات کے باوجود تمام فریقین کو ساتھ لے کر چلنے اور ملک کو درپیش مسائل کے حل کے لیے مذاکرات اور مشاورت کا عمل جاری رکھنے کے لیے تیار ہے۔