جماعت نہم کا پرچہ ری چیکنگ عمل بارے طلبہ اور والدین کا شدید تحفظات کا اظہار

راولپنڈی(عرفان چوہان سے) راولپنڈی تعلیمی بورڈ کے میٹرک پارٹ ون جماعت نہم امتحانات 2026 کے نتائج کے بعد ری چیکنگ کے عمل کے حوالے سے طلبہ اور والدین کی جانب سے شدید تحفظات کا اظہار کیا گیا ہے۔ متاثرہ طلبہ کے مطابق ری چیکنگ کے نام پر فی پرچہ بھاری فیس وصول کرنے کے باوجود انہیں جوابی کاپی کی مکمل جانچ پڑتال کے بجائے صرف نمبروں کی کاوٹنگ تک محدود رکھا جا رہا ہے، جس کے باعث طلبہ میں تشویش پائی جا رہی ہے۔تفصیلات کے مطابق میٹرک پارٹ ون جماعت نہم سالانہ امتحانات 2026 کے نتائج کے بعد متعدد طلبہ نے اپنے نمبروں پر تحفظات کے باعث ری چیکنگ کے لییدرخواستیں جمع کروائیں اور مقررہ فیس بھی ادا کی۔ طلبہ کا کہنا ہے کہ جب وہ ری چیکنگ کے عمل کے لیے متعلقہ ٹیم کے پاس پہنچے تو بعض صورتوں میں انہیں بتایا گیا کہ ری چیکنگ کا مطلب صرف نمبروں کی کاوٹنگ ہے، جبکہ سوالات کی دوبارہ جانچ، نمبر لگانے میں ممکنہ غلطی یا کسی سوال کے نمبر شمار ہونے سے رہ جانے کی صورت میں اس کی تصحیح ان کے دائرہ اختیار میں نہیں۔متاثرہ طلبہ کے مطابق بعض جوابی کاپیوں میں ایسے سوالات بھی موجود ہیں جن کے نمبر لگنے یا شمار ہونے کے حوالے سے انہیں اعتراضات ہیں، تاہم ری چیکنگ کے دوران ان اعتراضات کا تسلی بخش ازالہ نہ ہونے کی شکایات سامنے آ رہی ہیں۔ طلبہ کا مقف ہے کہ اگر ری چیکنگ کے لیے بھاری فیس وصول کی جا رہی ہے تو اس عمل میں صرف نمبروں کی گنتی کے بجائے قواعد کے مطابق جوابی کاپی کا مکمل جائزہ لیا جانا چاہیے تاکہ کسی طالب علم کے نمبر غلطی سے کم نہ رہ جائیں۔طلبہ اور والدین نے کہا ہے کہ امتحانی نتائج کسی بھی طالب علم کے مستقبل کے لیے انتہائی اہمیت رکھتے ہیں۔ ایک یا چند نمبروں کا فرق بھی طالب علم کے گریڈ، داخلے، میرٹ اور مستقبل کے تعلیمی مواقع پر اثرانداز ہو سکتا ہے، اس لیے ری چیکنگ کے عمل میں شفافیت اور میرٹ کو یقینی بنانا انتہائی ضروری ہے۔متاثرہ طلبہ نے چیئرمین راولپنڈی تعلیمی بورڈ اور متعلقہ اعلی حکام سے مطالبہ کیا ہے کہ ری چیکنگ کے طریقہ کار کا فوری نوٹس لیا جائے، طلبہ کی شکایات کی غیرجانبدارانہ جانچ کی جائے اور اس امر کو یقینی بنایا جائے کہ اگر کسی جوابی کاپی میں سوال کے نمبر لگانے یا شمار کرنے میں غلطی ہوئی ہے تو اسے مقررہ قواعد کے مطابق درست کیا جائے۔طلبہ کا مزید کہنا ہے کہ ری چیکنگ کے عمل کے حوالے سے انہیں واضح اور مکمل معلومات فراہم کی جائیں تاکہ انہیں یہ معلوم ہو سکے کہ ری چیکنگ کے دوران جوابی کاپی میں کن امور کا جائزہ لیا جاتا ہے۔ انہوں نے مطالبہ کیا کہ ری چیکنگ کے نظام کو مزید شفاف بنایا جائے اور طلبہ کو محض رسمی کارروائی تک محدود رکھنے کے بجائے ان کی شکایات کا مثر ازالہ کیا جائے۔متاثرہ والدین نے بھی بورڈ حکام سے اپیل کی ہے کہ معاملے کی انکوائری کر کے طلبہ کے تحفظات دور کیے جائیں اور اگر کسی مرحلے پر قواعد و ضوابط کی خلاف ورزی یا انتظامی غفلت ثابت ہو تو ذمہ داروں کے خلاف ضابطے کے مطابق کارروائی عمل میں لائی جائے۔