ابھی کوئی نوٹس موصول نہیں ہوا، ملنے پر بھرپور جواب دینگے،غلام مصطفی ملک

اسلام آباد(پ ر)پاکستان مسلم لیگ (ق) کے مرکزی سیکرٹری اطلاعات و ترجمان غلام مصطفی ملک نے وزیر اطلاعات پنجاب عظمی بخاری کےبیان پر ردعمل دیتے ہوئے کہا ہے کہ چوہدری سالک حسین نے وزیراعلی مریم نواز پر کوئی ذاتی الزام نہیں لگایا بلکہ حکومتی معاملات، سرکاری وسائل کے استعمال اور طرزِ حکمرانی سے متعلق سوالات اٹھائے ہیں۔ عظمی بخاری صاحبہ کی مسلسل وضاحتیں اور سخت ردعمل کئی سوالات کو جنم دے رہے ہیں۔ بقول محاورہ، چور کی داڑھی میں تنکا تو نہیں؟انہوں نے کہا کہ عظمی بخاری صاحبہ قانونی نوٹس اور معافی کے مطالبات کر رہی ہیں، حالانکہ ابھی تک ہمیں کوئی نوٹس موصول ہی نہیں ہوا۔کل کا جاری نوٹس تو پہنچا دیں ،جب نوٹس ملے گا تو اس کا بھرپور اور مناسب قانونی جواب دیا جائے گا۔ ہم نہ سوالات سے گھبراتے ہیں اور نہ قانونی نوٹسز سے۔غلام مصطفی ملک نے کہا کہ چوہدری سالک حسین وفاقی وزیر اور حکومتی اتحادی ہیں، کسی کو جواب دہ نہیں۔ اتحاد کا مطلب یہ نہیں کہ حکومتی معاملات میں غلطیوں یا ممکنہ بے ضابطگیوں پر خاموش رہا جائے۔ ڈی سی گجرات کی تعیناتی کے معاملے کو اچھال کر اصل سوالات سے توجہ نہیں ہٹائی جا سکتی۔ سفارش اپنی جگہ، سرکاری جہاز اور قومی وسائل کے استعمال پر سوالات اپنی جگہ موجود ہیں۔ سرکاری وسائل ذاتی استعمال میں آئیں گے تو سوالات بھی اٹھیں گے۔انہوں نے کہا کہ ترقیاتی منصوبے حکومت کی ذمہ داری ہیں، عوام پر کوئی احسان نہیں۔ منصوبوں کی تشہیر کے بجائے ان کی لاگت، معیار اور شفافیت پر بات ہونی چاہیے۔ کوئی بھی حکومتی عہدیدار عوامی احتساب اور تنقید سے بالاتر نہیں۔ترجمان مسلم لیگ (ق) نے سوال اٹھایا کہ کہیں مریم نواز صاحبہ چوہدری سالک حسین کی نئے صوبوں کے قیام کے لیے شروع کی گئی مہم سے خائف تو نہیں؟ کیا اس تحریک سے تختِ لاہور کے روایتی سیاسی اور انتظامی اختیارات کو خطرہ محسوس ہو رہا ہے، جس کے باعث چوہدری سالک حسین کے بیانات پر اتنا سخت ردعمل سامنے آ رہا ہے؟ نئے صوبوں کا قیام عوامی حقوق، انتظامی سہولت اور وسائل کی منصفانہ تقسیم کا معاملہ ہے۔غلام مصطفی ملک نے مزید کہا کہ ہم حکومت کا ساتھ قومی مفاد میں دے رہے ہیں، کسی کی خوشنودی کے لیے اپنی زبان بند نہیں کریں گے۔ عظمی بخاری صاحبہ کو سمجھنا چاہیے کہ اتحادی جماعتیں حکومت کی ملازم نہیں ہوتیں۔ ہم عزت کے ساتھ اتحاد نبھانا جانتے ہیں، لیکن اصولوں پر سمجھوتہ نہیں کریں گے۔